ភ្នំពេញ: រថយន្តដឹកដីមួយគ្រឿងភ្លេចទម្លាក់បែនចុះក្រោមវិញបានបើកទៅទាក់ខ្សែភ្លើង បណ្តាលឲ្យទុស្សេខ្សែភ្លើងឆេះ ផ្អើលប្រជាពលរដ្ឋពេញភូមិ ដែលហេតុការណ៍ កើតទ្បើងនៅវេលម៉ោង៧ និង១០នាទីយប់ថ្ងៃទី៣ ខែតុលា ឆ្នាំ២០១៨ តាមបណ្ដោយផ្លូវបេតុង ភូមិទួលពង្រ សង្កាត់ចោមចៅ១ ខណ្ឌពោធិ៍សែនជ័យ រាជធានីភ្នំពេញ។
រថយន្តខាងលើជាប្រភេទរថយន្តបែនដឹកដី ពណ៌ខៀវលាយលឿង ពាក់ស្លាកលេខ ភ្នំពេញ 3D -4361 បើកក្នុងទិសដៅពីជើងទៅត្បូង រងការខូចខាតយ៉ាងធ្ងន់ធ្ងរ។
តាមប្រភពព័ត៌មានពីកន្លែងកើតហេតុ បានឲ្យដឹងថា នៅមុនពេលកើតហេតុ គេឃើញរថយន្តដឹកដីខាងលើ បើកបរដោយយុវជនម្នាក់ និងមានអ្នករួមដំណើរម្នាក់ទៀត បានធ្វើដំណើរពីជើងទៅត្បូង ក្នុងល្បឿនលឿន ដោយមិនបានទម្លាក់បែនចុះក្រោមនោះទេ ទើបធ្វើឲ្យរថយន្តបើកទាក់ខ្សែភ្លើងដែលកាត់ទទឹងផ្លូវ បណ្តាលឲ្យដាច់ធ្លាក់ខ្សែភ្លើងចុះរាយប៉ាយពេញផ្លូវ និងទុសេ្សខ្សែភ្លើងលាន់ឮដូចកាំជ្រួច។
ប្រភពដដែលបានបន្ថែមថា ភ្លាមៗផងដែរ ប្រជាពលរដ្ឋនៅទីតាំងកើតហេតុ បានយកបំពង់ពន្លត់អគ្គិភ័យទៅបាញ់ពន្លត់ផងដែរ ហើយបានទាក់ទងទៅសមត្ថកិច្ចនគរបាលប៉ុស្តិ៍មកភ្លាមៗ ដោយកម្លាំងនគរបាលប៉ុស្តិ៍ បានទាក់ទងទៅអគ្គិសនីកម្ពុជា ដើម្បីបិទភ្លើង ចំណែកឯរថយន្តដឹកដីមិនបានបើកគេចឡើយ។
បើតាមសម្តីបុគ្គលិកអគ្គិសនីកម្ពុជា បាននិយាយថា ករណីដាច់ខ្សែភ្លើងបណ្ដាលឲ្យឆេះអស់ចំនួន១ដេប៉ា ស្មើនឹង៤ខ្សែធំៗ។
ក្រោយពេលកើតហេតុ រថយន្តខាងលើត្រូវបានជំនាញចរាចរណ៍ការិយាល័យផ្លូវគោករាជធានីភ្នំពេញ យកទៅរក្សាទុកនៅប៉ុស្ដិ៍ ដើម្បីរង់ចាំការដោះស្រាយពេលក្រោយ ចំណែកឯខាងអគ្គិសនីកម្ពុជា ព្យាយាមតភ្ជាប់ចរន្តឡើងវិញទាំងយប់ផងដែរ៕
មតិយោបល់