ស្វាយរៀង: យោងតាមផេក អគ្គនាយកដ្ឋានកាំកុងត្រូល បានឲ្យដឹងថា ថ្ងៃទី៩ ខែតុលា ឆ្នាំ២០១៧ ដោយបានការចាត់បញ្ជូនរថយន្តពិសោធន៍ចល័តនៃអគ្គនាយកដ្ឋានកាំកុងត្រូល ក្រុមការងារសាខាកាំកុងត្រូលខេត្តស្វាយរៀង និងទទួលបានកិច្ចសហការពីអាជ្ញាធរដែនដី គណកម្មការផ្សារ បានចុះទៅធ្វើការអង្កេតទីផ្សារប្រសូត ហៅផ្សារកណ្តៀងរាយ ស្ថិតក្នុងស្រុកស្វាយទាប និងផ្សារជីភូ ស្ថិតក្នុងក្រុងបាវិត ដើម្បីពិនិត្យលើប្រក្រតីភាព និងអនុលោមភាព នៃទំនិញដែលបានដាក់តាំងលក់លើទីផ្សារខាងលើ ព្រមទាំងបានធ្វើតេស្តបឋមទៅលើបន្លែ ផ្លែឈើ គ្រឿងផ្អាប់ គ្រឿងផ្សំ និងសាច់ងៀត មួយចំនួន សរុបចំនួន ៦៤ មុខ ។ បន្ថែមពីនេះ ក្រុមការងារក៏បានចាត់មន្ត្រីឲ្យទៅទិញ បាញ់ត្រាង និងបន្លែផ្ទាប់ ដែលដាក់តាំងលក់នៅវៀតណាម និងទាំងនៅខ្មែរ ដើម្បីធ្វើការពិសោធន៍ផងដែរ ។

ជាលទ្ធផលបង្ហាញថា ពុំមានវត្តមានសារធាតុគីមី ត្រូវបានរកឃើញនោះទេ លើកលែងតែផលិតផលចំនួន ៤ មុខ ដែលមានវត្តមានសំណល់ថ្នាំសម្លាប់សត្វល្អិត គឺ៖
១-ស្លឹកខ្ទឹម
២-ស្លឹកគូឆាយ
៣-ដំឡូងបារាំង
៤-ខ្ទឹមបារាំង
(សូមបញ្ជាក់ថា សំណល់ថ្នាំគីមីសម្លាប់សត្វល្អិត ដែលមាននៅលើបន្លែទាំងនេះ អាចធ្វើការលាងជម្រះបាន ដោយប្រើទឹកហូរ លាយជាមួយអំបិលធម្មជាតិដែលគ្មានជាតិអ៊ីយ៉ូដ ឬលាយនឹងទឹក ពែរម៉ង់កាណាត រួចធ្វើការចម្អិនទៅតាមលក្ខណ្ឌបច្ចេកទេស មុននិងបរិភោគ )
៥-សរសៃគុយទាវ ដែលផលិតនៅក្នុងខេត្តស្វាយរៀង មានសារធាតុគីមីហាមឃាត់ Borax ។

សាខានឹងធ្វើកិច្ចការនេះជាមួយស្ថាប័នអាណាព្យាបាល គឺមន្ទីរឧស្សាហកម្ម និងសិប្បកម្ម ក្រោយទទួលបានលទ្ធផល សាខានឹងរាយការជូន ថ្នាក់ដឹកនាំអគ្គនាយកដ្ឋានកាំកុងត្រូល ថ្នាក់ដឹកនាំខេត្ត និងព្រះរាជអាជ្ញាអមសាលាដំបូងខេត្ត ដើម្បីសុំការណែនាំ និងការសម្រេចក្នុងការអនុវត្តនូវនីតិវិធីការងារ៕