ភ្នំពេញ: រោងស្នាក់នៅ និងផ្ទុកគ្រឿងបន្លាស់រថយន្តក្រុងរបស់ក្រុមហ៊ុនភ្នំពេញដឹកអ្នកដំណើរ ត្រូវបានអគ្គិភ័យឆាបឆេះយ៉ាងសន្ធោសន្ធៅ សង្ស័យបណ្ដាលមកពីឆ្លងចរន្តអគ្គិសនី។
ហេតុការណ៍នេះ បានបង្កឲ្យមានការភ្ញាក់ផ្អើលយ៉ាងខ្លាំងកាលពីវេលាម៉ោង១២និង១០នាទីរំលងអធ្រាត្រ ឈានចូលថ្ងៃទី២១ ខែកុម្ភ: ឆ្នាំ២០១៩ ត្រង់ចំណុចខាងក្រោយឆៀងខាងជើងសាលាខណ្ឌសែនសុខ ស្ថិតតាមបណ្ដោយផ្លូវ៤៩៩ ភូមិរោងចក្រ សង្កាត់គោកឃ្លាង ខណ្ឌសែនសុខ។
តាមប្រភពពីបុរសម្នាក់ជាព្រូរថយន្ត ដែលស្នាក់ក្នុងរោងកើតហេតុខាងលើ បានឲ្យដឹងថា នៅមុនពេលកើតហេតុ គាត់និងកៃកុងរថយន្តជាច្រើននាក់ទៀត កំពុងតែដេកលក់យ៉ាងស្កប់ស្កល់ នៅទីតាំងខាងលើ។ ខណ:នោះក៏មានតៃកុងរថយន្តដែលដេកក្បែរគាត់ បានដាស់គាត់សួរថា មានឆេះអីមែន ព្រោះមានធំក្លិនឈ្ងៀមខ្លាំងណាស់។
ភ្លាមៗនោះគាត់ក៏បានងើបដើររកមើល ស្រាប់តែឃើញមានអណ្ដាតភ្លើងយ៉ាងសន្ធោសន្ធៅ លាយឡំនឹងផ្សែងខ្មួលខ្មាញ់ កំពុងតែឆាបឆេះរោងស្នាក់នៅ និងស្តុកគ្រឿងបន្លាស់រថយន្តដែលគ្មានអ្នកដេកនៅខាងក្នុង ក៏បានស្រែកឆោឡោបង្កឲ្យមានការភ្ញាក់ផ្អើលដល់តៃកុងរថយន្តផ្សេងៗទៀត នាំគ្នាទាញទុយយោទឹកបាញ់ពន្លត់ និងខ្លះទៀតនាំគ្នាជញ្ជូនសម្ភារ:ជួសជុលរថយន្តចេញទៅខាងក្រៅ។
ប៉ុន្តែដោយមិនអាចគ្រប់គ្រងស្ថានការណ៍បាន ពួកគាត់ក៏បានរាយការណ៍ជូនសមត្ថកិច្ចមូលដ្ឋាន និងរថយន្តពន្លត់អគ្គិភ័យឲ្យចុះមកអន្តរាគមន៍។ បន្ទាប់មកសមត្ថកិច្ចមូលដ្ឋានរួមទាំងរថយន្តពន្លត់អគ្គិភ័យរបស់ស្នងការនគរបាលរាជធានីភ្នំពេញ បានចុះមកដល់កន្លែងកើតហេតុចំនួន៧គ្រឿង ធ្វើការបាញ់ពន្លត់អណ្តាតភ្លើងដែលកំពុងតែឆាបឆេះរោងខាងលើអស់ទឹកចំនួន៤គ្រឿង ក៏រលត់ទៅវិញជាស្ថាពរ គឺរលត់នៅម៉ោង១២និង៤០នាទីរំលងអធ្រាត្រថ្ងៃដដែល។
សមត្ថកិច្ចបានឲ្យដឹងថា ហេតុការណ៍ខាងលើនេះ មិនបង្កឲ្យមានអ្នករងរបួសឬក៏ឆេះរាលដាលដល់ផ្ទះអ្នកជិតខាងនោះទេ គឺខូតខាតតែរោងទំហំប្រមាណ៥X១៥ម៉ែត្រ ដែលបាំងស័ង្កសីឆេះអស់ទាំងស្រុង និងគ្រឿងបន្លាស់រថយន្ត រួមទាំងឧបករណ៍ និងសម្ភារ:សម្រាប់ជួសជុលរថយន្តមួយចំនួនធំទៀត ត្រូវបានឆេះខូចខាតអស់។
ករណីអគ្គិភ័យនេះ ជំហានដំបូងសមត្ថកិច្ចបានសន្និដ្ឋានថា គឺបណ្ដាលមកពីឆ្លងចរន្តអគ្គិសនី ដែលនៅក្នុង រោងកើតហេតុខាងលើ៕
មតិយោបល់