កំពង់ឆ្នាំង: លោកអធិការរងស្រុកសាមគ្គីមានជ័យ ទទួលផ្នែកចរាចរណ៍បានប្រាប់ Post News ថា មានករណីគ្រោះថ្នាក់ចរាចរណ៍ដ៏រន្ធត់មួយបានកើតឡើង ដោយមានរថយន្តម៉ាកស៊ីណា មួយគ្រឿងបើកបរលឿនខ្លាំង បានបុកម៉ូតូមួយគ្រឿងពេញទំហឹងបណ្តាលឲ្យបុរសម្នាក់ស្លាប់ រួចរថយន្តបានជ្រុលទៅចង្កូតធ្លាក់ប្រឡាយតែម្តង។

ហេតុការណ៍នេះបានកើតឡើងកាលពីវេលាម៉ោង១២និង៤៥នាទី ថ្ងៃត្រង់ទី១០ ខែតុលា ឆ្នាំ២០១៧ ស្ថិតនៅចំណុច ជន្លាតដៃ ឃុំស្វាយ ស្រុកសាមគ្គីមានជ័យ ខេត្តកំពង់ឆ្នាំង។

បើតាមប្រភពព័ត៌មានបានឲ្យដឹងថា គេបានឃើញរថយន្តម៉ាកស៊ីណា ស្លាកលេខ ភ្នំពេញ 2S-4840 ខាងលើនេះបានបើកស្របគ្នាជាមួយនឹងម៉ូតូជនរងគ្រោះ​ក្នុងទិសដៅពីជើងទៅត្បូង លុះដល់ចំណុចកើតហេតុ ក៏បានបុកម៉ូតូចំពីក្រោយបណ្តាលឲ្យបុរសម្នាក់ស្លាប់ រួចរថយន្តបានជ្រុលចង្កូតធ្លាក់ចូលប្រឡាយតែម្តង។

ក្រោយកើតហេតុសមត្ថកិច្ចបានចុះមកធ្វើការវាស់វែង នាំយកមធ្យោបាយធ្វើដំណើរទាំង២គ្រឿងទៅរក្សាទុក រង់ចាំធ្វើការដោះស្រាយគ្នាពេលក្រោយតាមផ្លូវច្បាប់បន្តទៀត។ ចំណែកសាកសពត្រូវបានសមត្ថកិច្ចធ្វើកំណត់ហេតុប្រគល់ទៅឲ្យក្រុមគ្រួសារធ្វើបុណ្យតាមប្រពៃណី៕