កណ្តាល: មនុស្ស២នាក់ស្រីប្រុសបានរងរបួសធ្ងន់ ខណៈដែលជួបគ្រោះថ្នាក់ចរាចរណ៍រវាងរថយន្តម៉ាកសាំយ៉ុង បើកបុកម៉ូតូម៉ាក វ៉េវ ចំពីមុខយ៉ាងពេញទំហឹង។

ហេតុការណ៍គ្រោះថ្នាក់ចរាចរណ៍នេះបានកើតឡើងកាលពីវេលាម៉ោង៤និង១០នាទី ថ្ងៃទី១៤ ខែតុលា ឆ្នាំ២០១៧
នៅចំណុចផ្លូវចូលភូមិយួនលើផ្លូវ២១ ក្នុងភូមិព្រែកសំរោង៣ សង្កាត់តាខ្មៅ ក្រុងតាខ្មៅ ខេត្តកណ្តាល។

បើតាមនគរបាលចរាចរណ៍ក្រុងតាខ្មៅបានឲ្យដឹងថា គ្រោះថ្នាក់ចរាចរណ៍នេះបង្កឡើងដោយរថយន្តម៉ាក SSANG
YONG ពណ៌ស ពាក់ផ្លាកលេខ កំពង់ចាម 2A-4564 ធុនទេសចរ បើកបរក្នុងទិសដៅពីជើងទៅត្បូង បត់ឆ្វេង មកដល់ចំណុចខាងលើបុកជាមួយម៉ូតូម៉ាក HONDA WAVE ពណ៌ខ្មៅ គ្មានស្លាកលេខ ធុន សេ១២៥ បើកបរក្នុងទិសដៅពីត្បូងមកជើងអ្នកបើកបរឈ្មោះ សំណាង ភេទប្រុសអាយុ១៩ឆ្នាំ(របួសធ្ងន់) និងអ្នករួមដំណើរពីក្រោយឈ្មោះ ភាព ភេទស្រី អាយុ២០ឆ្នាំ (របួសធ្ងន់) ស្នាក់នៅក្នុងភូមិកំពង់ត្រាច ឃុំដំណាក់ចង្អើ ស្រុកកំពង់ត្រាច ខេត្តកែប បណ្តាលឲ្យរបួសធ្ងន់២នាក់ ត្រូវបានរថយន្តរបស់ស្នងការដ្ឋាន​នគរបាល​ខេត្ត​កណ្តាលដឹកយកទៅសង្គ្រោះនៅមន្ទីរពេទ្យបង្អែកជ័យជំនះ៕