ភ្នំពេញៈ ជនសង្ស័យចំនួន៣នាក់ ត្រូវបានកម្លាំងអាវុធហត្ថខណ្ឌ៧មករា ធ្វើការឃាត់ខ្លួន ក្រោយពីធ្វើសកម្មភាពឆក់តែមិនបានសម្រេច។

ការឃាត់ខ្លួននេះបានធ្វើឡើងកាលពីវេលាម៉ោង ១២និង ៣០នាទី ថ្ងៃទី២៩ ខែតុលា ឆ្នាំ២០១៧ នៅចំណុចផ្លូវ ១៣៤Z សង្កាត់វាលវង់ ខណ្ឌ៧មករា រាជធានីភ្នំពេញ។

ជនសង្ស័យទាំង៣នាក់ ទី១-ឈ្មោះ មាជ ណាង ភេទប្រុស អាយុ១៩ឆ្នាំ, ទី២-ឈ្មោះ កែវ រិទ្ធ ភេទប្រុស អាយុ១៩ឆ្នាំ និងជនសង្ស័យទី៣-ឈ្មោះ ង្វៀង វ៉ាងតឹង ភេទប្រុស អាយុ២៤ឆ្នាំ ជនជាតិវៀតណាម។

ជនរងគ្រោះឈ្មោះ ធឿន ចាន់ចរិយា ភេទស្រី អាយុ ២២ឆ្នាំ។ ក្នុងនោះដែរ កម្លាំងធ្វើការដកហូតវត្ថុតាងមាន៖ ម៉ូតូម៉ាក SUZUKI NEX ពណ៌ស០១៤ ស្លាកលេខ ភ្នំពេញ 1FC-6327 , ម៉ូតូសេ១២៥ ពណ៌ខ្មៅ ស៊េរី០៨ ស្លាកលេខ កណ្តាល 1C-3376 , ដំបងដែក (គ្រលាស់) ប្រវែង ៦តឹក, ដែកT កាច់សោក និង ដែកឆ្កឹះសោ៥ , ទូរស័ព្ទ ៤គ្រឿង។

បច្ចុប្បន្ន ជនសង្ស័យ និងវត្ថុតាង ត្រូវបានបញ្ជូនមកកាន់បញ្ជាការដ្ឋានកងរាជអាវុធហត្ថរាជធានីភ្នំពេញ ដើម្បីអនុវត្តតាមនីតិវិធីច្បាប់បន្តទៀត៕