កណ្តាលៈ អំពើហិង្សាមួយបានកើតឡើង បង្កដោយបុរសជាប្តីបានផឹកស្រាស្រវឹង រួចមករករឿងប្រពន្ធដល់ផ្ទះហើយបានយកកន្ត្រៃចាក់ប្រពន្ធរួចចាក់ខ្លួនឯង បណ្តាលអោយរងរបួសធ្ងន់ទាំងសងខាង(ប្តី-ប្រពន្ធ)។

ហេតុការណ៍នេះបានកើតឡើងកាលពីវេលាម៉ោង១១និង៣០នាទី ថ្ងៃទី៣០ ខែតុលា ឆ្នាំ២០១៧ នៅចំណុចភូមិព្រែកតានប់ ឃុំកំពង់ស្វាយ ស្រុកកៀនស្វាយ ខេត្តកណ្តាល។

នគរបាលស្រុកកៀនស្វាយបានប្រាប់អោយដឹងថា ជនរងគ្រោះ(ត្រូវជាប្រពន្ធ)ឈ្មោះស៊ឹម ស្រីប៉ុច ភេទស្រី អាយុ២៨ឆ្នាំ ជនជាតិខ្មែរ មុខរបរកសិករ មានទីលំនៅភូមិព្រែកតានប់ ឃុំកំពង់ស្វាយ ស្រុកកៀនស្វាយ ខេត្តកណ្តាល។ ជនសង្ស័យ(ត្រូវជាប្តី)ឈ្មោះ សេក ចាន់សូរិយា ភេទប្រុស អាយុ៣៥ឆ្នាំ ជនជាតិខ្មែរ មុខរបរ បើកបរ រថយន្ត មានទីលំនៅភូមិព្រែកតានប់ឃុំ កំពង់ស្វាយ ស្រុកកៀនស្វាយ ខេត្តកណ្តាល(ឃាត់ខ្លួន)។ វត្ថុតាងចាប់យកកន្ត្រៃដង ពណ៌ក្រហម១ប្រឡាក់ឈាម។

នគរបាលបានបញ្ជាក់ថា នៅថ្ងៃខែឆ្នាំវេលាម៉ោងខាងលើ ជនរងគ្រោះកំពុងតែដេកនៅលើផ្ទះ ពេលនោះជនសង្ស័យដែលត្រូវជាប្តីបានដើរមកពីផឹកស្រាដោយមានសភាពស្រវឹងខ្លាំងបានមករករឿងជនរងគ្រោះហើយបានយកកន្រ្តៃចាក់ទៅលើជនរងគ្រោះចំនួនមួយកន្រ្តៃចំដើមដោះខាងឆ្វេងបណ្តាលអោយមានរបួសចេញឈាមហើយជនសង្ស័យក៏បានចាក់ខ្លួនឯងចំនួនមួយកន្រ្តៃដែរ ចំដើមទ្រូងខាងឆ្វេង ។ បន្ទាប់មកជនរងគ្រោះបានស្ទុះយកកូនរត់ចុះមកក្រោមផ្ទះហើយក៏ស្រែកហៅម្តាយអោយជួយ ឃើញដូច្នេះម្តាយព្រមទាំងបងប្អូនក៏បានយកជនរងគ្រោះទៅមន្ទីរពេទ្យភំ្នពេញ រីឯជនសង្ស័យក៏បានទៅព្យាបាលរបួសនៅមណ្ទលសុខភាពឃុំកំពង់ស្វាយ ។ លុះមកដល់ថ្ងៃទី២៨ខែឆ្នាំដដែលវេលាម៉ោង៩.៣០នាទី ទើបជនរងគ្រោះបានមកដាក់ពាក្យបណ្តឹង នៅប៉ុស្តិ៍ពេលនោះកំលាំងនគរបាលប៉ុស្តិ៍កំពង់ស្វាយ ក៏បានចុះទៅឃាត់ខ្លួនជនសង្ស័យដោយរក្សាទុកនៅមណ្ឌលសុខភាពឃុំកំពង់ស្វាយ ដើម្បីបន្តចាត់ការទៅតាមនិតិវិធីច្បាប់៕