សៀមរាបៈ គ្រោះថ្នាក់ចរាចរណ៍មួយ រវាងរថយន្តឡិចស៊ីស៤៧០បានបុកជាមួយម៉ូតូមួយគ្រឿង អូសពីក្រោយជាច្រើនម៉ែត្រ បណ្តាលឲ្យមនុស្ស២នាក់រងរបួសធ្ងន់។

ហេតុការណ៍នេះបានកើតឡើងកាលពីថ្ងៃទី១ ខែវិច្ឆិកា ឆ្នាំ២០១៧ ស្ថិតនៅចំណុចទល់មុខផ្ទះសំណាក់លៀងឆាយហុង តាមបណ្តោយផ្លូវលេខ៦ ភូមិចុងកៅស៊ូ សង្កាត់ស្លាក្រាម ក្រុងសៀមរាប ខេត្តសៀមរាប។

សមត្ថកិច្ចបានឲ្យដឹងថា ជនរងគ្រោះទាំង២នាក់ខាងលើនេះទី១ មានឈ្មោះ គង់ វណ្ណី ភេទប្រុស អាយុ២៨ឆ្នាំ ស្នាក់នៅភូមិគោកស្រុក ឃុំពួក ស្រុកពួក ខេត្តសៀមរាប (រងរបួសធ្ងន់បាក់ជើង) និងជនរងគ្រោះទី២ឈ្មោះ តោ បារាំង ភេទប្រុស​ អាយុ២៧ឆ្នាំ ស្នាក់នៅជាមួយគ្នា (ជាអ្នកបើកម៉ូតូស្លាប់ក្រោយបញ្ជូនដល់មន្ទីរពេទ្យ។

ប្រភពព័ត៌មានបានបន្តថា មុនពេកកើតហេតុ គេបានឃើញរថយន្តម៉ាកឡិចស៊ីស៤៧០ ពណ៌ស ពាក់ស្លាកលេខ ភ្នំពេញ 2M-8677 បានជ្រុលទៅបុកម៉ូតូមួយគ្រឿងពាក់ស្លាកលេខ សៀមរាប 1A-2476 កំពុងជិះឌុបគ្នា២នាក់ពេញទំហឹង ហើយពេលប៉ះរួចនោះ ទាំងម៉ូតូនិងអ្នកបើកបរ រួមទាំងអ្នករួមដំណើរជាមួយគ្នា បានជាប់ជាមួយរថយន្តរហូតដល់មុខសណ្ឋាគារ តារា រស្សី ទើបរបូតអ្នករួមដំណើរលើចេញពីរថយន្តបណ្តាលឲ្យបាក់ជើងរងរបួសធ្ងន់ រហូតដល់ផ្លូវកែងបំបែក បេនឡានចុងកៅស៊ូ ទើបធ្លាក់អ្នកបើកបរម៉ូតូចេញពីរថយន្តបណ្តាលឲ្យស្លាប់ក្រោយបញ្ជូនដល់មន្ទីរពេទ្យ ហើយពេលនោះអ្នកបើកបររថយន្តមិនព្រមបញ្ឈប់យានយន្តនោះទេ ដោយបានបើកបន្តទាំងម៉ូតូជាប់នៅខាងក្រោម រថយន្ត រហូតដល់ច្រកចូលខាងមុខបុរីសុខលាភ ទើបប្រជាពលរដ្ឋនិងក្រុមប្រជាការពារ ធ្វើការឃាត់រថយន្តជាប់ ដោយមានការសហការជាមួយកម្លាំងនគរបាលអន្តរាគមន៍ ដែលប្រចាំការគោលដៅក្បែរនោះ បន្ទាប់មកបានបោះដៃហៅជំនាញចរាចរណ៍ មកធ្វើការវាស់វែង កសាងសំណុំរឿងបញ្ជូនមធ្យោបាយធ្វើដំណើរទាំង ២គ្រឿង ទៅរក្សាទុករង់ចាំធ្វើការដោះស្រាយគ្នាពេលក្រោយតាមច្បាប់បន្តទៀត៕