ពោធិ៍សាត់ៈ លោកវរសេនីយ៍ទោ ឯម រុន អធិការនគរបាលស្រុកក្រគរ បានប្រាប់ Post News ថា មានករណីគ្រោះថ្នាក់ចរាចរណ៍មួយ ដោយរថយន្ត១គ្រឿង បានបែកកង់ក្រឡាប់ចូលវាលស្រែ បណ្ដាលឲ្យរងរបួសធ្ងន់ស្រាលមនុស្ស ០៥ នាក់។

ហេតុការណ៍នេះ បានកើតទ្បើងកាលពីវេលាម៉ោង ១២ យប់ថ្ងៃទី៤ ខែវិច្ឆិកា ឆ្នាំ ២០១៧ តាមបណ្ដោយផ្លូវជាតិលេខ ៥ ចន្លោះគីឡូម៉ែត្រលេខ ១៧១ និង១៧២ ស្ថិតនៅភូមិត្រាំ ឃុំត្នោតជុំ ស្រុកក្រគរ ខេត្តពោធិ៍សាត់។

រថយន្តបង្ក ម៉ាកសាំយ៉ុង ពណ៌លឿង ពាក់ស្លាកលេខ កំពត 2A-1732 បើកបរពីលិចទៅកើត ដោយរថយន្តមានដឹកផ្លែម្នាស់ លុះដល់ចំណុច
កើតហេតុខាងលើ បានផ្ទុះកង់ក្រោយខាងឆ្វេង បណ្តាលឲ្យក្រឡាប់ចូលទៅវាលស្រែខាងជើងផ្លូវ។

អ្នកបើកបររថយន្តឈ្មោះ ស៊ឹម ពៅ អាយុ ៦៤ឆ្នាំ ភេទប្រុស ជនជាតិខ្មែរ (របួសធ្ងន់ ) និងមានអ្នករួមដំណើរ ៤ នាក់ទៀត ទី១-ឈ្មោះ សុខ ចំរើន អាយុ២០ឆ្នាំ ភេទប្រុស ជនជាតិខ្មែរ ( របួសធ្ងន់) ២- ឈ្មោះ ស៊ឹម ចាន់ទី អាយុ៤៨ឆ្នាំ ភេទស្រី ជនជាតខ្មែរ (របួសស្រាល ) ៣-ឈ្មោះ សុខ ស្រីមុំ អាយុ២៣ឆ្នាំ ភេទស្រី ជនជាតិខ្មែរ (របួសស្រាល ) និង៤-ឈ្មោះ វង វង្ស អាយុ ១៨ឆ្នាំ ភេទប្រុស ជនជាតិខ្មែរ ( របួសស្រាល) អ្នកទាំងអស់រស់នៅភូមិដំណាក់ ឃុំខ្ជាយខាងជើង ស្រុកដងទង់ ខេត្តកំពត។

ក្រោយកើតហេតុ ជនរងគ្រោះទាំង ៥ នាក់ ត្រូវបានបញ្ជូនទៅកាន់មន្ទីរពេទ្យខេត្តពោធិ៍សាត់៕