ភ្នំពេញ: ជនសង្ស័យ២នាក់ បានធ្វើសកម្មភាពឆក់កាបូបពីស្ត្រី២នាក់ម្តាយកូន នៅពេលកំពុងធ្វើដំណើរតាមផ្លូវ២១៧ បានសម្រេច ដោយជិះគេចខ្លួនបានចម្ងាយ១គីឡូ ក៏ត្រូវសមត្ថកិច្ចដេញតាម និងឃាត់ខ្លួនបានមកវិញភ្លាមៗផងដែរ។
ហេតុការណ៍នេះ បានកើតឡើងកាលពីវេលាម៉ោង៧ព្រឹក ថ្ងៃទី៦ ខែវិច្ឆិកា ឆ្នាំ២០១៧ ស្ថិតនៅភូមិខ្វា សង្កាត់ដង្កា ខណ្ខដង្កោ រាជធានីភ្នំពេញ។
ជនរងគ្រោះទី១.ឈ្មោះ ស៊ឹម ឡេង ភេទស្រី អាយុជាង៥០ឆ្នាំ ត្រូវជាម្ដាយ និងកូនឈ្មោះ អាង ដានី ភេទស្រី អាយុប្រហែល២០ឆ្នាំចំណែកជនសង្ស័យវិញ ទី១. ឈ្មោះ រ៉េត ពន្លក ភេទប្រុសអាយុ២៤ឆ្នាំ ជិះម៉ូតូមួយគ្រឿងម៉ាក ហុង ដា គុប ពណ៌ទឹកប្រាក់ ពាក់ស្លាកលេខភ្នំពេញ 1FR-9247 មុខរបរមិនពិតប្រាកដ ស្នាក់នៅភូមិបុរីកម្មករ សង្កាត់ជើងឯក ខណ្ខដង្កោ ជាអ្នកបើកម៉ូតូ និងទី២. ឈ្មោះ វឿន ដាវិត ភេទប្រុសអាយុ២១ឆ្នាំ មុខរបរមិនពិតប្រាកដ ស្នាក់នៅភូមិឃុំជាមួយគ្នា មានទីកន្លែងកំណើតនៅភូមិឬស្សី សង្កាត់ស្ទឹងមានជ័យ ខណ្ខមានជ័យ។
ប្រភពដដែល បានឲ្យដឹងថា មុនពេលកើតហេតុ ពីរនាក់ម្តាយកូន បានឌុបគ្នាទៅធ្វើការនៅរោងចក្រ តាមផ្លូវជាតិលេខ២១៧ លុះមកដល់ចំណុចខាងមុខមណ្ឌលសុខភាពដង្កោ ជនសង្ស័យទាំងពីរនាក់ បានឃើញកាបូបយួរ ពណ៌ខ្មៅ ស្រាប់តែមកដល់ក្បែរម៉ូតូរបស់ជនរងគ្រោះ ទើបឆក់កាបូបនោះហើយជិះគេចខ្លួន តែត្រូវជនរងគ្រោះ បានស្រែកឆោឡោឡើង ផ្អើលដល់សមត្ថកិច្ចប៉ុស្តិ៍ដង្កោ ដែលកំពុងល្បាតក៏ដេញតាមឃាត់ខ្លួនបានភ្លាមៗ។
បច្ចុប្បន្ន ជនសង្ស័យខាងលើ កំពុងត្រូវបានសមត្ថកិច្ចសាកសួរនៅប៉ុស្តិ៍នគរបាលដង្កោ ដើម្បីកសាងសំណុំរឿងបន្តទៅអធិកាដ្ឋាននគរបាលខណ្ខដង្កោ ចាត់ការបន្តតាមផ្លូវច្បាប់៕
មតិយោបល់