ភ្នំពេញ: ជនជាតិចិនចំនួន៣នាក់ បើករថយន្តបំណងចូលខារ៉ាអូខេ តែមិនបានស៊ីញ៉ូ ត្រូវបុរស២នាក់ជិះម៉ូតូចាប់ហ្វ្រាំងមិនទាន់ បណ្តាលឲ្យបុកចំពាក់កណ្តាលរថយន្តពេញទំហឹង រងរបួសធ្ងន់ទាំង២នាក់។
ហេតុការណ៍នេះបង្កឲ្យមានការភ្ញាក់ផ្អើល កាលពីវេលាម៉ោង៩និង១០នាទីយប់ ថ្ងៃទី៧ ខែវិច្ឆិកា ឆ្នាំ២០១៧ នៅតាមបណ្តោយផ្លូវជាតិលេខ៣ ទល់មុខមណ្ឌលកម្សាន្តម៉រឌែនស៊ីធី ស្ថិតនៅភូមិព្រីងខាងត្បូង សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ។
រថយន្តដែលបង្ក ពណ៌ស ពាក់ស្លាកលេខ ភ្នំពេញ 2AE-0850 បើកបរដោយបុរសជនជាតិចិនមានគ្នា៣នាក់ បើកឆ្លងផ្លូវពីលិចទៅកើត ។ ចំណែកម៉ូតូរងគ្រោះម៉ាកសងកូរ៉េ ពណ៌ក្រហម អត់ស្លាកលេខ ជិះគ្នា២នាក់បើកក្នុងទិសដៅពីត្បូងទៅជើង រងរបួសធ្ងន់២នាក់ ។
តាមប្រភពព័ត៌មានពីកន្លែងកើតហេតុបានបញ្ជាក់ឲ្យដឹងថា មុនពេលកើតហេតុ ម៉ូតូរងគ្រោះខាងលើជិះគ្នា២នាក់ បើកបរក្នុងទិសដៅពីត្បូងទៅជើងយ៉ាងលឿន លុះបើកមកដល់ចំណុចកើតហេតុ ស្រាប់តែឃើញរថយន្តបង្កបើកឆ្លងផ្លូវចូលខារ៉ាអូខេដោយមិនបានស៊ីញ៉ូ តែមិនទាន់បានឆ្លងផុតផង ជនរងគ្រោះជាន់ហ្វ្រាំងមិនជាប់ បានបុករថយន្តពេញទំហឹង បណ្តាលឲ្យជនរងគ្រោះរងរបួសធ្ងន់ទាំង២នាក់ តែអ្នកបើកម៉ូតូឈាមហូរតាមមាត់រងរបួសធ្ងន់ធ្ងរ ។ បន្ទាប់មកជនរងគ្រោះទាំង២នាក់ខាងលើត្រូវបានរថយន្តសង្គ្រោះដឹកយកទៅសង្គ្រោះភ្លាមៗផងដែរ ។
ក្រោយពេលកើតហេតុ ជំនាញចរាចរណ៍ខណ្ឌពោធិ៍សែនជ័យ បានវាស់វែងម៉ូតូ និងរថយន្តយកទៅរក្សាទុក ប៉ុន្តែភាគីបង្ក និងភាគីរងគ្រោះបានសម្របសម្រួលនៅពេទ្យដោយចេញថ្លៃជួសជុល និងថ្លៃព្យាបាលចំនួន៥៥០ដុល្លារ ដើម្បីបញ្ចប់រឿងនៅនឹងកន្លែង។
មតិយោបល់