សៀមរាប: លោក វរសេនីយ៍ទោ ភឹង សម្បត្តិ ស្នងការរងខេត្តសៀមរាប ទទួលផែនអគ្គិភ័យ បានប្រាប់ Post Newsថា មានករណីអគ្គិភ័យមួយបានឆាបឆេះផ្ទះមួយខ្នង បង្កឲ្យមានការភ្ញាក់ផ្អើលដល់ប្រជាពលរដ្ឋ រួមនឹងសមត្ថកិច្ចចុះមកអន្តរាគមន៍បាញ់ពន្លត់កាលពីវេលាម៉ោង១១និង៣០នាទី​យប់ថ្ងៃទី៧ ខែវិច្ឆិកា ឆ្នាំ២០១៧ ស្ថិតនៅចំណុចភូមិធ្លកអណ្តូង សង្កាត់ស្លក្រាម ក្រុងសៀមរាប ខេត្តសៀមរាប។

អគ្គិភ័យនេះបានឆេះបំផ្លាញ ផ្ទះថ្មប្រក់សង្ក័សី ទំហំ ០៤.៥០ម៉ែត្រ គុណនឹង០៥ម៉ែត្រ មួយខ្នង, ផ្ទះឈើប្រក់សង្ក័សីទំហំ ១៥ម៉ែត្រគុណនឹង៦ម៉ែត្រ ចំនួន៥បន្ទប់ មួយខ្នងផ្ទះ, រោងជួសជុលរថយន្ត និងរថយន្ត Tico ចំនួន២គ្រឿង រួមនឹងសម្ភារ:ប្រើប្រាស់មួយចំនួនទៀត ឆេះខូចខាតអស់ទាំងស្រុង ។

ក្នុងនោះដែរ សមត្ថកិច្ចបានប្រើប្រាស់រថយន្តពន្លត់អគ្គិភ័យចំនួន៤គ្រឿង ប្រើប្រាស់ទឹកអស់ចំនួន៤គ្រឿង ទើបរលត់ទៅវិញជាស្ថាពរ៕