កំពតៈ លោកវរសេនីយ៍ត្រី សេង រតនា អធិការរងស្រុកកំពង់ត្រាច ទទួលបន្ទុកផ្នែកចរាចរណ៍ បានប្រាប់ Post News ថា មានករណីគ្រោះថ្នាក់ចរាចរណ៍មួយបានកើតឡើងរវាងម៉ូតូនិងរថយន្ត បណ្តាលឲ្យបុរសម្នាក់ស្លាប់នៅនឹងកន្លែង។

ហេតុការណ៍កើតឡើងនៅវេលាម៉ោង៦ និង៣០នាទីយប់ ថ្ងៃទី៩ ខែវិច្ឆិកា ឆ្នាំ២០១៧ នៅលើផ្លូវជាតិលេខ៣៣ ភូមិអូច្រនៀង ឃុំកំពង់ត្រាចខាងលិច ស្រុកកំពង់ត្រាច ខេត្តកំពត។

នៅមុនពេលកើតហេតុ គេឃើញម៉ូតូមួយគ្រឿង ម៉ាកសេ១២៥ ស៊េរី២០១០ ពណ៌ខ្មៅ ពាក់ស្លាកលេខ តាកែវ1B-8177 បើកបរដោយឈ្មោះ សយ រិត ភេទប្រុស អាយុ២៨ឆ្នាំ ស្នាក់នៅភូមិកំពង់ត្រឡាច សង្កាត់ព្រៃធំ ក្រុងកែប ខេត្តកែប ទិសដៅម៉ូតូពីកើតទៅលិច លុះមកដល់កន្លែងកើតហេតុក៏បានបុកពីក្រោយរថយន្ត១គ្រឿង ម៉ាក ហ៊ីយ៉ាន់ដាយ ពណ៌ខៀវ ពាក់ស្លាកលេខ ភ្នំពេញ 3A-7305 ដែលបែកកង់ឈប់ចតលើថ្នល់ បើកបរដោយអ្នកមិនស្គាល់អត្តសញ្ញាណ។

ករណីខាងលើនេះវត្ថុតាងម៉ូតូនិងរថយន្តបានយកមករក្សាទុកនៅអធិការដ្ឋានរង់ចាំការដោះស្រាយពេលក្រោយ៕