កំពង់ឆ្នាំងៈ លោកអធិការរងស្រុករលាប្អៀរ ទទួលផ្នែកចរាចរណ៍ បានប្រាប់ Post News ថា មានករណីគ្រោះថ្នាក់ចរាចរណ៍មួយបានកើតឡើង បន្ទាប់ពីមានរថយន្តកាមរីបាឡែន​មួយគ្រឿង បើកលឿនពេកបុកបង្កាន់ដៃស្ពានក្រឡាប់ធ្លាក់ចូលទឹក បណ្តាលឲ្យមនុស្ស៤នាក់ ជាមន្ត្រីទាហាន ស្លាប់និងរបួស។

ករណីនេះកើតឡើងនៅម៉ោង៨និង៣០នាទី យប់ថ្ងៃទី១២ ខែវិច្ឆិកា ឆ្នាំ២០១៧ ស្ថិតនៅចំណុច បណ្ដោយផ្លូវជាតិលេខ៥ គីទ្បូម៉ែត្រ ៧២-៧៣ ភូមិត្រពាំងក្រពើ ឃុំទឹកហូត ស្រុករលាប្អៀរ ខេត្តកំពង់ឆ្នាំង។

គ្រោះថ្នាក់ចរាចរណ៍នេះ កើតឡើងបន្ទាប់ពីមានរថយន្តម៉ាកកាម៉ារីបាទ្បែន ពណ៌ទឹកប្រាក់ ពាក់ស្លាកលេខ 2Q-9172 បើកក្នុងល្បឿនលឿន ទិសដៅពីបន្ទាយមានជ័យ ឆ្ពោះមកភ្នំពេញ បានរ៉េចង្កូតបុកបង្កាន់ដៃស្ពានពេញទំហឹង បណ្ដាលឲ្យក្រទ្បាប់ធ្លាក់ចូលទឹក និងបណ្តាលឲ្យមនុស្ស២នាក់ស្លាប់ភ្លាមៗ និង២នាក់ទៀតរងរបួស ដែលពួកគាត់ទាំង៤នាក់ មានមុខរបរជា មន្ត្រីទាហាន ស្នាក់នៅក្នុងរាជធានីភ្នំពេញ។

ក្រោយកើតហេតុសមត្ថកិច្ចបានចុះទៅដល់កន្លែងកើតហេតុ ដើម្បីធ្វើការវាស់វែងយករថយន្តទៅរក្សាទុកដើម្បីរង់ចាំដោះស្រាយគ្នាពេលក្រោយបន្តទៀត។ ចំណែកសាកសពបានប្រគល់ឲ្យក្រុមគ្រួសារយកទៅធ្វើបុណ្យតាមប្រពៃណី៕