តាកែវៈ សមត្ថកិច្ចឃាត់ខ្លួនក្មេងទំនើងមួយក្រុម ពាក់ព័ន្ធនឹងករណីប៉ុនប៉ងប្រើហិង្សាប្រដាប់ដោយ ដាវ និងទីបដែក ស្ទាក់កាប់សិស្សសាលា និងរក្សាទុកសារធាតុញៀន។

ការចាប់ឃាត់ខ្លួននេះបានធ្វើឡើងនៅវេលាម៉ោង៤ និង២០នាទីរសៀល ថ្ងៃទី១៥ ខែវិច្ឆិកា ឆ្នាំ២០១៧ នៅចំណុច វិទ្យាល័យ ហ៊ុន សែន ត្នោតជុំ ស្ថិតនៅភូមិត្នោតជុំ ឃុំអូសារាយ ស្រុកត្រាំកក់ ខេត្តតាកែវ។

ជនសង្ស័យចំនួន៤នាក់ ទី១ឈ្មោះ ភូ ម៉ៃ ភេទប្រុស អាយុ១៧ឆ្នាំ ស្នាក់នៅភូមិឃុំកើតហេតុ, ទី២ឈ្មោះ ងាំ សៀវព្រេង ភេទប្រុស អាយុ១៧ឆ្នាំ នៅភូមិ ទួលខ្លុង ឃុំអូសារាយ, ទី៣ឈ្មោះ ភួង សត្យា ភេទប្រុស អាយុ២០ឆ្នាំ នៅភូមិត្រពាំងក្រសាំង ឃុំអូសារាយ និងទី៤ឈ្មោះ ឃន ពៅ ភេទប្រុស អាយុ ១៧ឆ្នាំ ស្នាក់ភូមិប្រកៀប ឃុំត្រពាំងធំខាងត្បូង។

ក្នុងនោះសមត្ថកិច្ចដកហូតវត្ថុតាំងរួមមាន ដាវដែកចំនួន២ដើម,ទីបដែកចំនួន២ដើម,ម្សៅក្រាមពណ៌សថ្លាចំនួន៦កព្ចាប់តូច,ទូរសព្ទដៃ១គ្រឿង,ដែកកេះ១ និង ម៉ូតូ១គ្រឿង។

ករណីនេះ សមត្ថកិច្ចកំពុងកសាងសំណុំរឿងតាមនីតិវិធីច្បាប់៕