ភ្នំពេញ: រថយន្តដឹកលើសចំណុះជិត ១០០គ្រឿង ត្រូវបានក្រសួងសាធារណចាត់វិធានការក្តៅ ដោយចាប់ផាកពិន័យជាថវិកាចូលរដ្ឋ បានជិត ២០០លានរៀល។

រយ:ពេល ០៦ថ្ងៃ គិតចាប់ពីថ្ងៃទី០១ ដល់ ថ្ងៃទី ០៦ ខែ មិថុនា ឆ្នាំ ២០១៦ លេខាធិការដ្ឋាន របស់គណ:កម្មាធិការសម្របសម្រួលអចិន្រ្តៃយ៍ នៃគណ:កម្មាធិការ ដឹកនាំការត្រួតពិនិត្យយានយន្ត ដឹកជញ្ជូនលើសទម្ងន់កម្រិតកំណត់ សហការជាមួយមន្ត្រីពាក់ព័ន្ធ នៅតាមស្ថាននីមួយចំនួន ឃាត់បាន រថយន្តដឹកទំនិញ លើសទម្ងន់កម្រិតកំណត់ចាប់ពី ០៤តោន រហូតដល់ ១៨តោន ចំនួន ៨៦គ្រឿង និង ផាកពិន័យបាន ថវិកាសរុបចំនួន ១៦៨.៥៨៧.០០០រៀល។

យោងតាមផេក Facebook របស់ក្រសួងសាធារណការ និងដឹកជញ្ជូន បានឲ្យដឹងនៅរាត្រីនេះថា លទ្ធផលនៃការត្រួតពិនិត្យតាមស្ថានីយនីមួយៗគឺ៖
១./ ស្ថានីយប្រាសាទ ( ខេត្តកំពង់ធំ ) ៣១ គ្រឿង
២./ស្ថានីយរាជានុកូល ( ស្ទឹងត្រែង ) ២៧ គ្រឿង
៣./ ស្ថានីយថ្នល់កែង ( កំពង់ចាម ) ៦ គ្រឿង
៤./ស្ថានីយ កូនដំរី ( បន្ទាយមានជ័យ ) ៥ គ្រឿង
៥./ ស្ថានីយឃ្លាំងសម្បត្តិ ( តាកែវ ) ៣ គ្រឿង
៦./ ស្ថានីយឃ្លាំងមឿង ( ពោធិសាត់ ) ២ គ្រឿង
៧./ ស្ថានីយថ្នល់ទទឹង ( ត្បូងឃ្មុំ ) ៣ គ្រឿង
៨./ ស្ថានីយព្រែកឯង ( ភ្នំពេញ ) ១ គ្រឿង
៩./ ស្ថានីយមានជ័យ ( ក្រចេះ ) ២ គ្រឿង
១០./ ស្ថានីយត្រពាំងក្រហម ( រតនគីរី ) ១ គ្រឿង
១១./ ស្ថានីយអង្គស្នួល ( កណ្តាល ) ១ គ្រឿង
១២./ ស្ថានីយស្ទឹងច្រាល ( ព្រះសីហនុ ) ១ គ្រឿង
១៣./ស្ថានីយពួក (សៀមរាប) ១ គ្រឿង
១៤./ ស្ថានីយព្រៃភ្នៅ (ព្រៃវែង) ២ គ្រឿង

ការចុះធ្វើសកម្មភាពនេះ ត្រូវបានធ្វើឡើងតាមអនុសាសន៍ របស់លោក ស៊ុន ចាន់ថុល ដែលបានណែនាំឲ្យ មន្ត្រីពាក់ព័ន្ធ បន្តខិតខំពង្រឹងការទប់ស្កាត់ និងអប់រំ រថយន្តទាំងឡាយណា ដែលដឹកជញ្ជូនទំនិញលើសទម្ងន់កម្រិតកំណត់ ឲ្យកាន់តែមានប្រសិទ្ធភាព។ គោលបំណងនៃការឃាត់រថយន្តដឹកលើសទម្ងន់ ព្រមទាំងធ្វើការផាកពិន័យ គឺដើម្បីឲ្យអ្នកប្រើប្រាស់ផ្លូវថ្នល់សាធារណ: ជាពិសេសម្ចាស់រថយន្ត និង ក្រុមហ៊ុនដឹកជញ្ជូន ចូលរួមគោរពច្បាប់ទាំងអស់គ្នា ដើម្បីការពារ ហេដ្ឋារចនាសម្ព័ន្ធផ្លូវថ្នល់ ឲ្យមានចីរភាព តាមអាយុកាលស្តង់ដាបច្ចេកទេសកំណត់។

សូមបញ្ជាក់ផងដែរថា កាលពីថ្ងៃទី២៥ ថ្ងៃទី២៨ និងថ្ងៃទី២៩ ខែឧសភា ឆ្នាំ២០១៦ ក្រសួងសាធារណការ និងដឹកជញ្ជូន បានចាប់ឃាត់រថយន្តធុនធំ ដឹកលើសទម្ងន់ចំនួន៣០គ្រឿង និងផាកពិន័យបានទឹកប្រាក់ប្រមាណ៤៣លានរៀល ក្នុងរយ:ពេលតែ៣ថ្ងៃប៉ុណ្ណោះ នៅខេត្តកណ្ដាល កំពង់ឆ្នាំង ព្រៃវែង ពោធិ៍សាត់ និងរាជធានីភ្នំពេញ។

បន្ទាប់ពីឃាត់រថយន្តដឹកលើសទម្ងន់ទាំង៣០គ្រឿង លោក សេង ឈួន អនុរដ្ឋលេខាធិការ និងជាប្រធានលេខាធិការដ្ឋានរបស់គណ:កម្មាធិការសម្របសម្រួលអចិន្ត្រៃយ៍ នៃគណ:កម្មាធិការដឹកនាំការត្រួតពិនិត្យយានយន្តដឹកជញ្ជូនលើសទម្ងន់កម្រិតកំណត់ ក៏បានធ្វើការអប់រំណែនាំដល់អ្នកបើកបររថយន្តដឹកទំនិញទាំងនោះ កុំឲ្យដឹកទំនិញលើសកម្រិតកំណត់បន្តទៀត និងចូលរួមជាមួយគ្នាដើម្បីថែរក្សាផ្លូវសាធារណ:ឲ្យប្រើប្រាស់បានកាន់តែយូរអង្វែង។
ក្នុងឱកាសនេះដែរ លោក សេង ឈួន ក៏បានធ្វើការអំពាវនាវដល់ប្រជាពលរដ្ឋ និងឈ្មួញដែលជាម្ចាស់រថយន្ដដឹកទំនិញឲ្យចូលរួមគោរពច្បាប់ចរាចរណ៍ទាំងអស់គ្នា ក្នុងគោលបំណងរក្សាឲ្យបានភាពយូរអង្វែងនៃផ្លូវថ្នល់សាធារណ: និងដើម្បីកាត់បន្ថយគ្រោះថ្នាក់ចរាចរណ៍នានាជូនប្រជាពលរដ្ឋ។
គួរជម្រាបផងដែរថា កាលពីពេលកន្លងទៅថ្មីៗ រថយន្តដឹកអង្ករមួយគ្រឿង ព្រោះតែដឹកលើសទម្ងន់កំណត់ក៏បានបណ្ដាលឲ្យបែកកង់នៅលើស្ពាន ហើយធ្វើឲ្យខូចកៅស៊ូស្ពានអ្នកលឿង ឬស្ពានស៊ូប៉ាសា រហូតធ្វើឲ្យកើតមានប្រតិកម្មដល់សម្ដេចតេជោ នាយករដ្ឋមន្ត្រី បញ្ជាឲ្យចាប់រថយន្តនោះ ព្រមទាំងម្ចាស់រថយន្តយកមកផ្តន្ទាទោសតាមច្បាប់៕