ភ្នំពេញៈ លោកវរសេនីយ៍ឯក ឈិន គីមធុយ អធិការខណ្ឌព្រែកព្នៅ បានប្រាប់ Post Newsថា មានករណីបុរសម្នាក់ដេកស្លាប់ក្នុងរថយន្ដយ៉ាងអាណោចអាធ័ម។

ហេតុការណ៍នេះ បានកើតឡើង កាលពីវេលាម៉ោង៦និង១០នាទីព្រឹក នៅថ្ងៃទី២៣ ខែវិច្ឆិកា ឆ្នាំ២០១៧ នៅត្រង់ចំណុចមុខឃ្លាំងសាំងស៊ូគីមិច ស្ថិតនៅលើផ្លូវជាតិលេខ៥ ភូមិពោធិ៍មង្គល សង្កាត់ព្រែកព្នៅ ខណ្ឌព្រែកព្នៅ រាជធានីភ្នំពេញ។

ជនរងគ្រោះមានឈ្មោះ វ៉ាត សុវណ្ណ ភេទប្រុស អាយុ២៣ឆ្នាំ មុខរបរបើកបរ មានទីលំនៅភូមិព្រែកសែន ឃុំសំពៅពូន ស្រុកកោះធំ ខេត្តកណ្ដាល ។
ប្រភពដដែល បានបន្តថា មុនពេលកើតហេតុ ជនរងគ្រោះនិងឈ្មោះ ង្វៀង ហុងផាត់ បានដឹកបង្កងពីស្រុកកោះធំ យកមកលក់នៅយឿរត្រី ស្ថិតនៅភូមិពោធិ៍មង្គល សង្កាត់ព្រែកព្នៅ ខណ្ឌព្រែកព្នៅ រាជធានីភ្នំពេញ ពេលមកដាក់បង្កងចុះពីលើរថយន្ដអស់ ជនរងគ្រោះបានបើករថយន្ដទៅសម្រាកនៅចំណុចកើតហេតុខាងលើ លុះមកដល់ម៉ោងកើតហេតុ ឈ្មោះ ង្វៀង ហុងផាត់ បានឲ្យឈ្មោះ ឃុត បូរិន ទៅហៅជនរងគ្រោះដើម្បីដឹកអីវ៉ាន់ត្រលប់ទៅផ្ទះវិញ លុះប្រមាណជា៥នាទីក្រោយមក ឈ្មោះបូរិនបានមកប្រាប់ឈ្មោះ ង្វៀង ហុងផាត់ថា ជនរងគ្រោះបានស្លាប់ នៅក្នុងរថយន្ដបាត់ទៅហើយ។

លោកវរសេនីយ៍ឯក បានបញ្ជាក់ថា ជនរងគ្រោះខាងលើនេះ មានជំងឺគាំងបេះដូង។

ក្រោយកើតហេតុ កម្លាំងជំនាញបានចុះទៅធ្វើកោសល្យវិច័យ រួចសន្និដ្ឋានថា ជនរងគ្រោះពិតជាបានស្លាប់ដោយសារគាំងបេះដូងពិតប្រាកដមែន។
ចំណែកសាកសពប្រគល់មកក្រុមគ្រួសារ យកទៅធ្វើបុណ្យតាមប្រពៃណី៕