ស្វាយរៀងៈ ករណីគ្រោះថ្នាក់ចរាចរណ៍មួយបានកើតឡើង រវាងរថយន្តនិងម៉ូតូ បណ្តាលឲ្យភាគីខាងម៉ូតូរងរបួសធ្ងន់ស្រាលចំនួន២នាក់។

ហេតុការណ៍នេះ បានកើតឡើង កាលពីវេលា៦និង២០នាទីយប់ ថ្ងៃទី២៣ ខែវិច្ឆិកា ឆ្នាំ២០១៧ នៅលើបណ្តោយផ្លូវជាតិលេខ១ ចន្លោះគីឡូម៉ែត្រលេខ១២៤និង១២៥ ស្ថិតក្នុងភូមិសួនថ្មី សង្កាត់ព្រៃឆ្លាក់ ក្រុងស្វាយរៀង ខេត្តស្វាយរៀង។

ម្ចាស់ម៉ូតូមានឈ្មោះ អ៊ុង យ៉ាន់ ភេទប្រុស អាយុ៦០ឆ្នាំ មុខរបរចូលនិវត្តន៍(រងរបួសស្រាល) បើកម៉ូតូមួយគ្រឿងម៉ាកហុងដាសេ១២៥ ពណ៌ខ្មៅ ពាក់ស្លាកលេខស្វាយរៀង 1A-8955 និងអ្នករួមដំណើរម្នាក់ឈ្មោះ ដុំ សៅ ភេទស្រី អាយុ៦២ឆ្នាំ មុខរបរកសិករ(ស្លាប់ក្រោយពេលបញ្ជូនដល់មន្ទីរពេទ្យ​​) ទាំងពីរនាក់ស្នាក់នៅភូមិចំបក់ សង្កាត់ចេក ក្រុងស្វាយរៀង ខេត្តស្វាយរៀង។ ចំណែកម្ចាស់រថយន្ត មិនត្រូវបានស្គាល់អត្តសញ្ញាណច្បាស់នោះទេ បើករថយន្តមួយគ្រឿងម៉ាក ហ៊ីយ៉ាន់ដាយ ពណ៌ខៀវ ពាក់ស្លាកលេខភ្នំពេញ ៣.គ.៧៦៥៣។

នៅមុនពេលកើតហេតុ គេឃើញភាគីខាងម៉ូតូបានធ្វើដំណើរ ពីលិចទៅកើត រីឯភាគីខាងរថយន្តហ៊ីយ៉ាន់បានកំពុងបត់ឆ្លងផ្លូវខាងឆ្វេងដៃមិនប្រយ័ត្ន ទើបបង្កឲ្យបុកគ្នាពេញទំហឹង បណ្តាលឲ្យភាគីខាងម៉ូតូរបួសស្រាលម្នាក់(ពាក់មួកសុវត្តិភាព) និងម្នាក់ទៀតរបួសធ្ងន់ ដោយសារមិនពាក់មួកសុវត្តិភាព រួចបញ្ជូនទៅសង្រ្គោះនៅមន្ទីរពេទ្យ រីឯម្ចាស់រថយន្ត បានគេចខ្លួនបាត់ស្រមោល។

ក្រោយកើតហេតុ សមត្ថកិច្ចបាននាំយកមធ្យោបាយធ្វើដំណើរទាំងពីរ មករក្សាទុក នៅអធិការដ្ឋាននគរបាលក្រុងស្វាយរៀង ដើម្បីដោះស្រាយបន្តតាមផ្លូវច្បាប់៕