តាកែវៈ មានករណីគ្រោះថ្នាក់ចរាចរណ៍មួយបានកើតឡើង រវាងម៉ូតូសណ្តោងរម៉កបានបុកជាមួយនឹងម៉ូតូគុបជ្រុង បណ្តាលឲ្យបុរសម្នាក់ស្លាប់យ៉ាងរន្ធត់នៅនឹងកន្លែង។

ហេតុការណ៍នេះបានកើតឡើងកាលពីវេលាម៉ោង៦និង១៥នាទី ល្ងាចថ្ងៃទី២៥ ខែវិច្ឆិកា ឆ្នាំ២០១៧ ស្ថិតនៅចំណុចផ្លូវជាតិលេខ១២៩ ចន្លោះគីឡូម៉ែត្រ ២៩-៣០ ភូមិពាម ឃុំកំពង់រាម ស្រុកព្រៃកប្បាស ខេត្តតាកែវ។

គ្រោះថ្នាក់ចរាចរណ៍នេះកើតឡើងរវាង ម៉ូតូម៉ាកគុបជ្រុង សេ៩០ ពណ៌ទឹកប៊ិច ពាក់ស្លាកលេខ តាកែវ 1E-2712 បើកបរដោយឈ្មោះ លឹម យឿន ភេទប្រុស​ អាយុ៣៧ឆ្នាំ ស្នាក់នៅភូមិកំពង់ស្វាយ ឃុំព្រែកថ្មី ស្រុកកោះធំ ខេត្តកណ្តាល បានបុកជាមួយម៉ូតូសណ្តោងរម៉កម៉ាកវ៉េវអាល់ហ្វា ពណ៌ខ្មៅ ស៊េរីឆ្នាំ២០១០ គ្មានស្លាកលេខ ពេញទំហឹង បណ្តាលឲ្យបុរសអ្នកបើកម៉ូតូគុបស្លាប់នៅនឹងកន្លែងយ៉ាងរន្ធត់តែម្តង។ ចំណែកអ្នកបើករម៉កម៉ូតូគេចខ្លួនបាត់ពីកន្លែងកើតហេតុ។

ក្រោយកើតហេតុ សមត្ថកិច្ចបានធ្វើការវាស់វែង នាំយកមធ្យោបាយខាងលើទៅរក្សាទុក រង់ចាំដោះស្រាយគ្នាបន្តទៀត និងប្រគល់សពឲ្យគ្រួសារធ្វើបុណ្យតាមប្រពៃណី៕