​បន្ទាយមានជ័យ: ជាងពិដានម្នាក់ ត្រូវចរន្តអគ្គិសនីឆក់រងរបួសយ៉ាងធ្ងន់ធ្ងរ កាលពីវេលាម៉ោង៩ព្រឹក ថ្ងៃទី២៨ ខែវិច្ឆិកា ឆ្នាំ២០១៧ ខណ:កំពុងតែរៀបធ្វើពិដានផ្ទះថ្មីឲ្យគេ នៅបណ្តោយមហាវិថី៧មករា ខាងត្បូងសាលាក្រុង ក្នុងភូមិខ្លាកូនចាស់ សង្កាត់ កំពង់ស្វាយក្រុង សិរីសោភ័ណ ខេត្តបន្ទាយមានជ័យ។

ជនរងគ្រោះត្រូវបានអធិការក្រុងសិរីសោភ័ណលោក ស៊ី ឌី ប្រាប់ថា មានឈ្មោះ ភូ ភុយ ភេទប្រុស អាយុ ៥០ឆ្នាំ រស់នៅភូមិព្រៃទទឹងឃុំភ្នំតូចស្រុកមង្គលបូរី ខេត្តបន្ទាយមានជ័យ បច្ចុប្បន្ន ស្នាក់នៅធ្វើពិដានផ្ទះឲ្យឈ្មោះ មឿន សីហា ភេទប្រុសអាយុ៣៨ឆ្នាំ។

សាក្សីនិយាយថា គេបានឮសំលេងផ្ទុះចេញពីខ្លួនជនរងគ្រោះនិងអណ្តាតភ្លើង ដែលឆេះនៅផ្នែកខាងស្តាំ ខ្លោចមួយចំហៀងខ្លួន។ការដែលផ្ទុះឆេះនេះគឺបណ្តាលមកពីការ លើកដែកពិដានទៅប៉ះជាមួខ្សែភ្លើងស្រាតដែលស្ថិតនៅលើដំបូលផ្ទះ។

អ្នករិះគន់បាននិយាយថា អាជ្ញាធរក្រុងនិងមន្ទីរជំនាញគួរយកចិត្តទុកដាក់ ចំពោះសំណង់មួយនេះ មិនត្រូវឲ្យសង់គៀកនឹងបង្គោលភ្លើង នឹងក្បែរផ្លូវពេកទេ ព្រោះងាយនឹងបង្កឲ្យមានហានិភ័យផ្សេងៗ។
បច្ចុប្បន្នជនរងគ្រោះកំពុងស្ថិតក្រោមការជួយសង្គ្រោះពីក្រុមគ្រូពេទ្យនៃមន្ទីរពេទ្យបង្អែកមិត្តភាពកម្ពុជា-ជប៉ុនស្រុកមង្គលបូរី៕