កំពតៈ ហេតុការណ៍ភ្ញាក់ផ្អើលមួយ បានកើតឡើង បន្ទាប់ពីប្រជាពលរដ្ឋបានប្រទះឃើញសាកសពបុរសម្នាក់
ជើងខ្វៀនជាប់លើស្ពានទ្វារប្រឡាយទឹក និងក្បាលធ្លាក់ចុះក្នុងទឹក។

ករណីខាងលើនេះ បានកើតឡើង កាលពីវេលាម៉ោង៦និង៣០នាទីព្រឹក ថ្ងៃទី២៨ ខែវិច្ឆិកា ឆ្នាំ២០១៧ ស្ថិតនៅភូមិដំណាក់ក្រឡាញ់ខាងលិច ឃុំភ្នំប្រាសាទ ស្រុកកំពង់ត្រាច ខេត្តកំពត។

ជនរងគ្រោះមានឈ្មោះ ច្រឹង ភា ភេទប្រុស អាយុ២៧ឆ្នាំ ស្នាក់នៅភូមិឃុំកើតហេតុខាងលើ។

បន្ទាប់ពីទទួលបានដំណឹង ភ្លាមនោះសមត្ថកិច្ច បានចុះទៅដល់កន្លែងកើតហេតុ ដែលមានចម្ងាយប្រហែល៣០០ម៉ែត្រពីផ្ទះជនរងគ្រោះហើយនៅជុំវិញកន្លែងកើតហេតុ មិនមានផ្ទះអ្នកជិតខាងនៅជិតទេ មានតែផ្ទះចោលគ្មានមនុស្សរស់នៅ១ខ្នង ដែលម្ចាស់ផ្ទះមានឈ្មោះ ខាន់ សុខុម ហើយមានចម្ងាយ៤០ម៉ែត្រពីកន្លែងកើតហេតុ ចំណែកសពជនរងគ្រោះត្រូវបានក្រុមគ្រួសារ យកចេញពីកន្លែងកើតហេតុ។

បើយោងតាមសម្តីស្រ្តីម្នាក់មានឈ្មោះ ប៊ន ឆាយ៉ា ភេទស្រី អាយុ៣០ឆ្នាំ ត្រូវជាប្រពន្ធជនរងគ្រោះ បានប្រាប់ឲ្យដឹងថា រូបគាត់និងជនរងគ្រោះបានរស់នៅជមួយគ្នា ព្រមទាំងមានកូន២នាក់ ហើយប្តីគាត់តែងផឹកស្រាស្រវឹងជាប្រចាំ ជួនកាលផឹកស្រាវឹងបាត់ពីផ្ទះផងដែរ។ទើបស្រវឹងស្រាធ្លាក់ចូលប្រឡាយទឹកបណ្តាលឲ្យសា្លប់ពិតប្រាកដមែន។

ក្រោយកើតហេតុ សមត្ថកិច្ចបានចុះទៅធ្វើកោសល្យវិច័យ និងប្រគល់សពជូនក្រុមគ្រួសារ យកទៅធ្វើបុណ្យតាមប្រពៃណី៕