កណ្ដាល: ប្រធានក្រុមហ៊ុនមជ្ឈមណ្ឌលបណ្ដុះបណ្ដាលភាសាជប៉ុន ស៊ី អិល ជ្រើសរើសបណ្ដុះបណ្ដាល និងបញ្ជូនសិក្ខាកាមទៅធ្វើកម្មាសិក្សានៅប្រទេសជប៉ុន បានគំរាមសម្លាប់ស្ត្រីម្នាក់ តែត្រូវប្រឈមមុខនឹងផ្លូវច្បាប់ ខណ:ដើមបណ្ដឹងបានសំណូមពរឲ្យស្ថាប័នតុលាការ ចាត់ការតាមផ្លូវច្បាប់។
ប្រភពព័ត៌មានច្បាស់ការណ៍មួយ បានបង្ហើបឲ្យដឹងថាលោក ហេង ផេង ព្រះរាជអាជ្ញារងនៃអយ្យការអមសាលាដំបូងខេត្តកណ្ដាល បានកោះហៅឈ្មោះ ឆៀង ឆុម អាយុ៤១ឆ្នាំ ស្នាក់នៅភូមិមរ សង្កាត់ដង្កោ ខណ្ឌដង្កោ រាជធានីភ្នំពេញ ឲ្យចូលបំភ្លឺនៅព្រឹកថ្ងៃទី៨ ខែធ្នូ ឆ្នាំ២០១៧ខាងមុខនេះជុំវិញដំណើររឿង «គំរាមកំហែងសម្លាប់ស្ត្រីម្នាក់ឈ្មោះ សុខ សោភ័ណ្ឌ»។
បើយោតាមមាត្រា២៣៣ នៃច្បាប់ព្រហ្មទណ្ឌ បានចែងថា «ការគំរាមកំហែងថានឹងសម្លាប់ ប្រសិនបើប្រព្រឹត្តធ្វើម្តងហើយម្តងទៀត និងសម្តែងចេញតាមលិខិត រូបភាព ឬក៏វត្ថុតាងអី្វមួយនោះ នឹងត្រូវផ្តន្ទាទោសដាក់ពន្ធនាគារ ចាប់ពី៦ខែទៅ២ឆ្នាំព្រមទាំងពិន័យជាប្រាក់ ចាប់ពី១លានរៀលទៅ៤លានរៀល»។
ពាក់ព័ន្ធនឹងករណីខាងនេះ លោកស្រី សុខ សោភ័ណ្ឌ ត្រូវជាដើមបណ្ដឹងបានអះអាងថា ខណ:ដែលសមត្ថកិច្ចឃាត់ខ្លួនឈ្មោះ អៀត សារឹម បញ្ជូនមកស្នងការដ្ឋាននគរបាលខេត្តកណ្ដាល គេឃើញវត្តមានបុរសម្នាក់មានឈ្មោះ ឆៀង ឆុម បាននិយាយគំរាមជាច្រើន និងស្រែកឡូឡា ជុំវិញការឃាត់ខ្លួនឈ្មោះ អៀត សារឹមផងដែរ។
ប្រធានក្រុមហ៊ុនរូបនេះ បានគំរាមដើមបណ្ដឹងថា ចាំជួបគ្នានៅសាលាឧទ្ធរណ៍ម្តងទៀត ហើយនឹងធ្វើឲ្យដើមបណ្ដឹងត្រូវជាប់គុកម្តង ព្រមទាំងពាក្យប្រមាថអាយុជីវិតមួយចំនួនទៀត បើទោះជាត្រូវបានគំរាមកំហែងយ៉ាងណាក្តីលោកស្រី សុខ សោភ័ណ្ឌ នៅតែបន្តអះអាងថា ពុំមានការខ្លាចញញើតឡើយ ហើយសង្ឃឹមនិងជឿជាក់ថា តុលាការនឹងផ្ដល់ភាពយុត្តិធម៌សម្រាប់រូបគាត់ផងដែរ។
ក្រោយពីទទួលបានពាក្យបណ្តឹង ពីដើមចោទ រហូតមកដល់ថ្ងៃទី៣០ ខែវិច្ឆិកា ឆ្នាំ២០១៧
នៅពុំទាន់អាចស្វែងរកប្រភពព័ត៌មាន ដែលទាក់ទងប្រធានក្រុមហ៊ុនរូបនេះនៅឡើយទេ៕
មតិយោបល់