ភ្នំពេញ: កម្លាំងនគរបាលប៉ុស្តិ៍ផ្សារដេប៉ូទី៣ ខណ្ឌទួលគោក បានឃាត់ខ្លួនជនសង្ស័យ០១នាក់ក្នុងចំណោម៣នាក់ ពីបទប៉ុនប៉ងលួចម៉ាស៊ីនត្រជាក់ កាលពីវេលាម៉ោង២និង៣០នាទីរំលងអាធ្រាត្រឈានចូលថ្ងៃទី០៩ មិថុនា ២០១៦ ចំណុចក្រុមហ៊ុនទេសចរណ៌ STB ដែលមានទីតាំងនៅផ្ទះ លេខ១៤៧ ផ្លូវលេខ១២២ហ្សេត ក្រុមទី៣៧ ភូមិ៨ សង្កាត់ផ្សារដេប៉ូទី៣ ខណ្ឌទួលគោក។
ប្រភពឲ្យដឹងថា មុនដំបូង ប្រជាពលរដ្ឋបានរាយការណ៍ប្រាប់សមត្ថកិច្ចថា មានជនសង្ស័យ ០៣នាក់ កំពុងធ្វើសកម្មភាពលួចម៉ាស៊ីនត្រជាក់ ភ្លាមនោះ សមត្ថកិច្ចយើងបានចុះអន្តរាគមន៍ដោយឃាត់ខ្លួន បានជនសង្ស័យ០១នាក់ឈ្មោះ លី សុខពិសិដ្ឋ បានជាក់ស្តែង កំពុងកាត់ខ្សែម៉ាស៊ីនត្រជាក់ ចំណែកជនសង្ស័យ០២នាក់ទៀត បានរត់គេចខ្លួនបាត់។
ប្រភពបន្តថា ជនសង្ស័យឃាត់ខ្លួនបានឈ្មោះ លី សុខពិសិដ្ឋ ហៅ ពិសិដ្ឋ ភេទប្រុស អាយុ ១៦ឆ្នាំ ជនជាតិខ្មែរ មុខរបរមិនពិតប្រាកដ ស្នាក់នៅផ្ទះលេខ១៨ ផ្លូវរថភ្លើង សង្កាត់ទឹកល្អក់ ទី១ ខណ្ឌទួលគោក រាជធានីភ្នំពេញ។
ប្រតិបត្តិការខាងលើនេះ សមត្ថកិច្ចដកហូតវត្ថុតាងរួមមាន៖ ដង្កាប់សម្រាប់កាត់ខ្សែភ្លើង ចំនួន០១ និងកូនសោរចំនួន០៤ លេខ១០,១៤ ,៨ និងលេខ១២។
បច្ចុប្បន្ន ជនសង្ស័យកំពុងឃាត់ខ្លួននៅអធិការដ្ឋាន នគរបាលខណ្ឌទួលគោក ដើម្បីសាកសួរ និងកសាង សំណុំរឿងបញ្ជានទៅតុលាការចាត់ការតាមច្បាប់៕
មតិយោបល់