ភ្នំពេញ: ជារើយៗប្រជាពលរដ្ឋរស់នៅក្នុងរាជធានីភ្នំពេញ ពិសេសក្នុងខណ្ឌទួលគោកបានសង្កេតឃើញថា អាជ្ញាធរខណ្ឌទួលគោកតែងតែមានសកម្មភាពអនុវត្តយុទ្ធនាការរំដោះចិញ្ចើមផ្លូវដែលបានដាក់ចេញដោយសាលារាជធានីភ្នំពេញ ខណ:ដែលអាជ្ញាធរខណ្ឌមួយចំនួនទៀតហាក់ធ្វើសកម្មភាពបែបនេះតែនៅពេលអភិបាលរាជធានីបញ្ជា ឬរិះគន់តែប៉ុណ្ណោះ។
ជាក់ស្តែងកាលពីព្រឹកថ្ងៃទី៩ ខែមិថុនា ឆ្នាំ២០១៦ម្សិលមិញ អាជ្ញាធរខណ្ឌទួលគោក ដឹកនាំដោយ លោក ប៉ាង លីដា អភិបាលរងខណ្ឌទួលគោក និងមានការចូលរួមពីកម្លាំងនគរបាល កម្លាំងកងរាជរាវុធហត្ថ កម្លាំងប្រជាការពារ បានបន្តចុះធ្វើការងាររៀបចំសណ្តាប់ធ្នាប់នៅតាមបណ្តោយផ្លូវ២៨៩ ម្តុំរង្វង់មូលទួលគោក រហូតដល់អង់តែនទួលគោក ក្រោយពីបានចុះអនុវត្តនៅតាមដងផ្លូវសំខាន់ជាច្រើនក្នុងទឹកដីខណ្ឌមួយនេះ។
ការចុះរៀបចំសណ្តាប់ធ្នាប់នេះ នៅគ្រាដែលគេបានសង្កេតឃើញថា នៅមានប្រជាពលរដ្ឋមួយចំនួននៅមិនទាន់គោរពតាមគោលការណ៍ណែនាំរបស់សាលាខណ្ឌដែលធ្លាប់បានដាក់ចេញសេចក្តីជូនដំណឹងដល់ប្រជាពលរដ្ឋឱ្យបញ្ឈប់ការចាក់សាប រៀបឥដ្ឋ ធ្វើសំយ៉ាប តាំងលក់ទំនិញ និងសកម្មភាពផ្សេងៗដែលប៉ះពាល់ដល់សណ្តាប់ធ្នាប់សាធារណ: ពិសេសវាជាការរំលោភចិញ្ចើមផ្លូវសម្រាប់អ្នកថ្មើរជើង។
លោក ប៉ា លីដា អភិបាលរងខណ្ឌទួលគោក បានថ្លែងថា ដោយទទួលបានគោលការណ៍ណែនាំពីសាលារាជធានីភ្នំពេញ និងមានការណែនាំផ្ទាល់របស់លោក ឯក ឃុនឌឿន អភិបាលខណ្ឌទួលគោក យុទ្ធនាការរំដោះចិញ្ចើមផ្លូវនៅក្នុងទឹកដីខណ្ឌទួលគោក គឺនឹងធ្វើឡើងដូចភ្លៀងរលឹម រហូតទាល់តែដងផ្លូវសំខាន់ៗមួយចំនួនក្នុងខណ្ឌត្រូវបានរំដោះចេញពីការរំលោភបំពានរបស់ប្រជាពលរដ្ឋ។ លោកបានឲ្យដឹងថា យុទ្ធនាការមួយនេះ គឺធ្វើឡើងក្នុងគោលបំណងយកចិញ្ចើមផ្លូវសម្រាប់ឱ្យអ្នកដំណើរដើរបាន ពីព្រោះនៅពេលបច្ចុប្បន្ននេះ រាជធានីភ្នំពេញ គឺមានបញ្ហាកកស្ទះចរាចរណ៍រៀងរាល់ថ្ងៃ ហើយការរំលោភយកចិញ្ចើមផ្លូវធ្វើជាកម្មសិទ្ធិបុគ្គលក៏ជាកក្តារួមផ្សុំក្នុងបញ្ហានេះផងដែរ។ ដូច្នេះ ដើម្បីចូលរួមកាត់បន្ថយបញ្ហាចរាចរណ៍អាជ្ញាធរខណ្ឌ គឺត្រូវតែដោះស្រាយកក្តារួមចំណែកតូចៗមួយចំនួនឱ្យមានប្រសិទ្ធភាពជាមុនសិន។
គួររំឮកថា នៅក្នុងដើមឆ្នាំ២០១៦នេះ សាលារាជធានីភ្នំពេញបានដាក់ចេញ នៅគោលការណ៍ណែនាំឱ្យអាជ្ញាធរខណ្ឌទាំងអស់អនុវត្តយុទ្ធនាការរំដោះចិញ្ចើមផ្លូវពីការរំលោភបំពាន ដោយដាក់តាំងលក់ទំនិញ ការចាក់សាបរបងរឹងមាំ និងសកម្មភាពទាំងឡាយណាដែលបានយកចិញ្ចើមផ្លូវទៅធ្វើជាកម្មសិទ្ធផ្ទាល់ឯកជនផ្ទាល់ខ្លួន ដើម្បីស្វែងរកប្រយោជន៍ ខណ:ចិញ្ចើមផ្លូវ គឺជាទីកន្លែងសម្រាប់អ្នកថ្មើរជើង។
ទោះជាយ៉ាងណា សកម្មភាពរំដោះចិញ្ចើមផ្លូវហាក់នៅមានកម្រិត គឺដោយសារតែអាជ្ញាធរនៅមិនទាន់បានអនុវត្តឱ្យបានផុសផុលនៅឡើយ ចំណែកពលរដ្ឋក៏នៅមានចំណេះមានកម្រិតក្នុងការសហការជាមួយអាជ្ញាធរក្នុងការដោះស្រាយបញ្ហានេះ៕
មតិយោបល់