ភ្នំពេញៈ គ្រោះថ្នាក់ចរាចរណ៍មួយបង្កឡើងដោយម៉ូតូហុងដា មួយគ្រឿង បើរបរយ៉ាងលឿនជ្រុលបុកម៉ូតូសង់កូរ៉េ ពីក្រោយពេញទំហឹង បណ្ដាលឲ្យមនុស្ស៣នាក់សន្លប់ ស្ដូក មនុស្ស២នាក់ទៀតរងរបួសស្រាល កាលពីវេលាម៉ោង៧និង៥០នាទីយប់ថ្ងៃទី០៩ ខែមិថុនា ឆ្នាំ២០១៦ ស្ថិតនៅលើកំណាត់ផ្លូវជាតិលេខ៣ ភូមិព្រៃកី សង្កាត់ភ្លើងឆេះរទេះ ខណ្ឌពោធិ៍សែនជ័យ។
អ្នកឃើញហេតុការណ៍ បាននិយាយថា អ្នកបើកបរម៉ូតូហុងដាឌ្រីមសេ១២៥ សេរ៊ី២០០៧ ពណ៌ខ្មៅ ពាក់ស្លាកលេខ ភ្នំពេញ 1Y-0031 ជិះគ្នា៣នាក់ បើកបរដោយឈ្មោះ រ៉ា ភេទប្រុស អាយុ២៧ឆ្នាំ មុខរបរ កម្មករសំណង់ រងរបួសធ្ងន់ អ្នករួមដំណើរដោយឈ្មោះ ដេត ធន់ ហៅខូ ភេទប្រុស អាយុ១៩ឆ្នាំ មុខរបរ កម្មករសំណង់ រងរបួសស្រាល និងម្នាក់ទៀតឈ្មោះ ហ៊ីម បុទុម ភេទប្រុស អាយុ១៦ឆ្នាំ មុខរបរ កម្មករសំណង់ រងរបួសស្រាល។ ជនរងគ្រោះ ទាំង៣នាក់ ស្នាក់នៅ ភូមិបែកចាន ឃុំបែកចាន ស្រុកអង្គស្នួល ខេត្តកណ្តាល មានស្រុកកំណើត នៅភូមិដងទង់ ឃុំដំបូកខ្ពស់ ស្រុកអង្គជ័យ ខេត្តកំពត។ ដោយឡែក ភាគីម៉ូតូ មួយគ្រឿងទៀតម៉ាក សង់កូរ៉េ ពណ៌ក្រហម កញ្ចាស់ គ្មានស្លាកលេខ ជិះគ្នាពីរនាក់មិនស្គាល់ឈ្មោះ ជនរងគ្រោះ ស្ថិតក្នុងសភាពរបួសធ្ងន់ធ្ងរ សន្លប់ឈឹង សល់តែដង្ហើមចង្រិត។
ក្រោយពេលកើតហេតុ ជនរងគ្រោះ ត្រូវបានរថយន្តសង្គ្រោះរបស់អង្គភាព៧១១ ដឹកបញ្ជូនទៅមន្ទីរពេទ្យព្រះកុសុមៈ ដើម្បីជួយសង្គ្រោះ។ រីឯម៉ូតូទាំងពីរគ្រឿងត្រូវបាន នគរបាលជំនាញ វាស់វែងរួចយកទៅរក្សាទុកនៅ ការិយាល័យចរាចរផ្លូវគោកគោកនៃ ស្នងការដ្ឋាននគរបាលរាជធានីភ្នំពេញដើម្បីរងចាំធ្វើការដោះស្រាយពេលក្រោយតាមនីតិវិធី៕
មតិយោបល់