ភ្នំពេញ: ក្រុមកំពូលតារាង ក្រសួងកាពារជាតិ កំពុងត្រូវការ៣ពិន្ទុជាចាំបាច់ ពី Cambodian Tiger ដើម្បីបន្តកាន់កាប់តំណែងកំពូលតារាងនាំមុខគូប្រជែង បឹងកេតអង្គរ ដែលត្រូវជួប ណាហ្គាវើល ល្ងាចនេះនៅពហុកីឡដ្ឋានជាតិ។ ប្រសិនបើទ័ពចាញ់ហើយបឹងកេតឈ្នះ ក្រុមដែលមានមូលដ្ឋាននៅស្តាតចាស់នេះនឹងធ្លាក់ទៅលេខ២។

ប្រវត្តិក្នុងលីគ ៖ ក្រសួងកាពារជាតិ ចាញ់តែម្តងគត់ ក្នុងចំណោម៨ប្រកួតកន្លងមក ចំណែក Cambodian Tiger ឈ្នះ៤ ចាញ់៣ ស្មើ១។ ជំនួប២លើកឆ្នាំមុន កាពារជាតិ ឈ្នះ ១ Tiger ឈ្នះ១។

ជើងកីឡាករ៖ ខ្សែប្រយុទ្ធ ភួង សុខសាណា របស់កាពារជាតិ មានរបួសជើងអំឡុងពេលជួយជម្រើសជាតិឈ្នះ ទីម័រខាងកើត ២-០ កាលចុងសប្តាហ៍មុន, ចំណែកអ្នកចាំទី អ៊ំ សេរីរ័ត្ន និង ខ្សែប្រយុទ្ធ កែ វណ្ណ: ក៏មិនទាន់ជាទាំងស្រុងដូចគ្នា។ ងាកទៅ Cambodian Tiger កីឡាករនិងជាគ្រូបង្វឹក Masa ក៏កំពុងញំញីដោយរបួសដូចគ្នា។

កាពារជាតិ នឹងជួប Cambodian Tiger ម៉ោង៦ល្ងាចនេះ នៅពហុកីឡដ្ឋានជាតិ ក្រោយ បឹងកេតអង្គរ ជួប ណាហ្គាវើល នៅម៉ោង៣រសៀល។ នៅទីលាន RSN ម្ចាស់ផ្ទះភ្នំពេញក្រោន ក៏នឹងបើកទ្វារទទួលភ្ញៀវ ស៊ីម៉ាក់ វេលាម៉ោង៦ល្ងាចផងដែរ៕