ព័ត៌មានជាតិ

ប្រើឈ្មោះកូននាយករដ្ឋមន្រ្តីបោកពលរដ្ឋមិនអស់ចិត្ត បោកទាំងមន្រ្តីតុលាការទៀត

ភ្នំពេញ: ប្រជាពលរដ្ឋមួយចំនួនបានសម្តែងការហួសចិត្តទៅនឹងមនុស្ស៣នាក់​  ដែលជំនាញខាងបោកប្រាស់​  ប៉ុន្តែមិនជំនាញរហូត​ បន្ទាប់ពីប្រើឈ្មោះកូននាយករដ្ឋទៅបោកប្រជាពលរដ្ឋ​ និងបោកមន្រ្តីតុលាការក្រុងភ្នំពេញ​ ។ 

នៅ​ព្រឹក​ថ្ងៃ​ទី​១២​ ខែ​មិថុនា​ ឆ្នាំ​២០១៦​ លោកប៊ុន​ ធី​ ចៅក្រម​ស៊ើប​សួរ​សាលា​ដំបូង​រាជធានី​ភ្នំពេញ​ ​បានសម្រេច​ឃុំ​ជនសង្ស័យ​បី​នាក់​ពាក់ព័ន្ធករណី​​ក្លែងបន្លំ​ជាមន្ត្រីនៅក្នុង​​ក្រសួងបរិស្ថាន ហើយ​បានយក​ឈ្មោះ លោក​​ ហ៊ុន ម៉ា​នី ប្រធាន​សហភាព​សម្ព័ន្ធ​យុវជន​កម្ពុជា ក្នុងការ​រកស៊ី​ទិញ​លក់​ដី ឲ្យ​អ្នក​វិនិយោគ​ដែលមាន​តម្លៃ​ជាង​២លាន​ដុល្លារ​។

ជនសង្ស័យ​ទាំង​បីនាក់​ខាងលើ​ ទី១.​ឈ្មោះ សួន មាន ភេទ​ប្រុស អាយុ​៤៧​ឆ្នាំ​, ទី២ ឈ្មោះ ហង្ស សុខា ភេទ​ប្រុស អាយុ​៤៧​ឆ្នាំ​,​ ទី៣ ឈ្មោះ ស៊ុន សុខ​ហេង ភេទ​ប្រុស អាយុ​៥៨​ឆ្នាំ។

អ្នក​ទាំង​បី​ ត្រូវ​បានលោកព្រះរាជអាជ្ញា​រង ​​ហ៊ឹង​ ប៊ុន​ថន​​ ​សម្រេចចោទប្រកាន់ពីបទ ឆបោក​ បទបញ្ញត្តិ​ដែល​មាន​ចែង​ក្នុង​មាត្រា​ ៣៧៧,​ ៣៧៨​ នៃ​ក្រមព្រហ្មទណ្ឌ​កម្ពុជា​។

បើយោង​តាម​ប្រភព​ពី​សមត្ថកិច្ច​បាន​ឲ្យដឹង​ថា ​ជនសង្ស័យម្នាក់ឈ្មោះ សួន មាន បាន​យ​ក​ ឈ្មោះ​ថ្នាក់ដឹកនាំក្រសួងបរិស្ថាន និង កូនថ្នាក់ដឹកនាំជាន់ខ្ពស់ដើរទិញដីឲ្យអ្នកវិនិយោគ​ បរទេសក្នុងតម្លៃជាង​២លានដុល្លារ នៅភូមិឫទ្ធី១ ឃុំកែវផុស ស្រុកស្ទឹងហាវ ខេត្តព្រះសីហនុ តែធាតុពិតមិនមានដីឲ្យ​​ដើម​បណ្ដឹង​នោះ​ទេ​ គឺ​លក់​ដី​ខ្យល់​។ ចំណែក​ឯ​ជនសង្ស័យ​ឈ្មោះ ហង្ស សុខា​ បាន​យក​ ឈ្មោះ លោក​​ ហ៊ុន ម៉ានី ប្រធានសហភាព​សហព័ន្ធយុវជនកម្ពុជា និងជាអ្នក​តំណាងរាស្ត្រមណ្ឌលខេត្តកំពង់ស្ពឺ ទៅដើរទិញលក់ដី​ និង​ឈ្មោះ ​ស៊ុន សុខ​ហេង ដែល​ជា​មេ​ភូមិ​ ដើរ​តួ​ជា​អ្នក​រៀប​ចំ​ដី​ឲ្យ​អ្នក​វិនិយោគ​។

ពាក់ព័ន្ធនិង​សំណុំរឿង​នេះ​ដែរ​ ខណ:​ បញ្ចូន​ជនសង្ស័យ​ទាំង​បី​ខាង​លើ​ទៅ​តុលាការ​ មាន​រឿង​គួរ​ឲ្យ​កត់សម្គាល់​មួយ​ គឺ​ មានកម្លាំង​នាយកដ្ឋាន​នគរបាល​ព្រហ្មទណ្ឌ​ក្រសួង​មហាផ្ទៃ​ ម្នាក់បាន​ទៅសូម​កាត​ភ្ញៀវ​​ពីប៉ូលិស​ប្រចាំ​ការ​នៅ​តុលាការ​ក្រុង​ហើយ​ប្រាប់​ថា​ ជន​សង្ស័យ​​ទាំង​បី​នាក់​នោះ​ជា​ភ្ញៀវ​ ទើប​ប៉ូលិស​ប្រចាំ​តុលាការ​ ឲ្យ​កាតភ្ញៀវ​ចំនួន​បី​ ហើយ​ឲ្យ​ពួកគេ​ពាក់​ក្នុង​គោលបំណង​ ចង់​បន្លំ​ភ្នែក​អ្នក​សារព័ត៌មាន​ ប៉ុន្តែ​បន្តិច​ក្រោយ​មក​ត្រូ​​វបា​ន​ប៉ូលិស​ប្រចាំ​ការ​នៅ​តុលាការ​ដក​ហូត​យក​កាត​ភ្ញៀវ​វិញ​ បន្ទាប់​ពី​បាន​ដឹង​ថា​ បុរស​បីនាក់​នោះ ​គឺជា​ជនសង្ស័យ​៕

មតិយោបល់