កំពង់ធំ: កាលពីថ្ងៃទី១៥ ខែមករា ឆ្នាំ២០១៨ មានករណីគ្រោះថ្នាក់ចរាចរណ៍មួយបានកើតឡើង រវាងរថយន្តឡិចស៊ីស បើកបុកម៉ូតូ ក្នុងទិសផ្ទុយគ្នា ដោយភាគីខាងម៉ូតូបត់ឆ្លងផ្លូវក្នុងល្បឿនលឿន ខ្វះការប្រុងប្រយ័ត្ន បណ្ដាលឲ្យស្លាប់ លើផ្លូវជាតិលេខ៦ ភូមិកំពង់សំរោង សង្កាត់ស្រយ៉ូវ ក្រុងស្ទឹងសែន ខេត្តកំពង់ធំ។
ជនរងគ្រោះមានឈ្មោះ ស្រ៊ុន សំរឹត ភេទប្រុស អាយុ៤៧ឆ្នាំ មុខរបរជាងសំណង់ បើកម៉ូតូម៉ាកហុងដាគុប ពណ៌ខៀវ ស្លាកលេខ ក.ធ១.៤៤៦៥ ស្នាក់នៅភូមិឃុំកើតហេតុ។ ចំណែកជនបង្កមានឈ្មោះ សាយ សាម៉ន ភេទប្រុស អាយុ៤៧ឆ្នាំ ស្នាក់នៅភូមិទី១ សង្កាត់ពាមក្រសោម ខណ្ឌមណ្ឌលសីមា ខេត្តកោះកុង បើករថយន្តម៉ាកឡិចស៊ីស៤៧០ ពណ៌ខ្មៅ ស្លាកលេខភ្នំពេញ 2N-9919។
ក្រោយកើតហេតុ សមត្ថកិច្ចបាននាំយកវត្ថុតាងមករក្សាទុក នៅស្នងការនគរបាលខេត្ត ដើម្បីដោះស្រាយបន្តតាមផ្លូវច្បាប់។ ចំណែកសពប្រគល់ជូនក្រុមគ្រួសារ យកទៅធ្វើបុណ្យតាមប្រពៃណី៕
មតិយោបល់