កណ្ដាលៈ កាលពីវេលាម៉ោង៣ទៀបភ្លឺថ្ងៃទី១៣ ខែមិថុនា ឆ្នាំ២០១៦មានករណីលិចទូកដឹកទំនិញមួយ នៅចំណុចកំពង់ផែដែកយូលឹម ភូមិខ្សុំ ឃុំបន្ទាយដែក ស្រុកកៀនស្វាយ ខេត្តកណ្តាល បណ្ដាឲ្យមនុស្ស២នាក់បាត់ខ្លួន។

តាមសេចក្តីរាយការណ៍បានឲ្យដឹងថា ជនរងគ្រោះដែលនៅលើទូកមានចំនួន៨នាក់ ប្រុស៧នាក់ ស្រី១នាក់ ហែលរួចខ្លួន៦នាក់ និងបាត់ខ្លួន២នាក់ ក្នុងនោះមានស្រី១នាក់។ ជនរងគ្រោះដែលបាត់ខ្លួនមានឈ្មោះចាំង ម៉ីថាន់ ភេទស្រី អាយុ២៨ឆ្នាំជនជាតិវៀតណាម មានទីលំនៅប្រទេសវៀតណាម និងឈ្មោះ ផាម ជីធិន ភេទប្រុស អាយុ០២ឆ្នាំ (ត្រូវជាកូនរបស់ឈ្មោះចាំង ម៉ីថាន់)។

សេចក្តីរាយការណ៍បានបន្តថា នៅវេលាម៉ោង១៩និង៣០នាទីទូកដឹកដែក១គ្រឿងចំណុះ៣០០តោន មកពីប្រទេសវៀតណាម បានចូលចតចំណុចកើតហេតុខាងលើ លុះដល់វេលាម៉ោងកើតហេតុស្រាប់តែទឹកនាចទៅវិញ បណ្តាលឲ្យទូកផ្អៀងលិចទៅក្នុងទឹកទន្លេបាត់ និងបាត់ខ្លួនម្ដាយនិងកូន។

ក្រោយកើតហេតុនេះកម្លាំងជំនាញ និងមន្រ្តីប៉ុស្តិ៍បានចុះទៅដល់កន្លែងកើតហេតុ ដើម្បីជួយអន្តរាគមន៍៕