កំពតៈ កូនរមិលគុណម្នាក់ បានទាញពូថៅកាប់ប្រហារទៅលើឪពុកបង្កើតរបស់ខ្លួនឯងដោយគ្មានប្រណី បណ្តាលឲ្យរងរបួសជា ទម្ងន់ កាលពីវេលាម៉ោង៧និង០០នាទីយប់ ថ្ងៃទី១២ ខែមិថុនា ឆ្នាំ២០១៦ ស្ថិតភូមិអណ្ដូងខ្មែរ សង្កាត់អណ្តូងខ្មែរ ក្រុងកំពត ខេត្តកំពត។
នគរបាលអធិការក្រុងកំពត បានឲ្យដឹងថា ជនសង្ស័យមានឈ្មោះ ហេង វិបុល ភេទប្រុស អាយុ២៧ឆ្នាំ ឪពុកបង្កើតរងរបួស ឈ្មោះ ហេង សម្បត្តិ អាយុ៥៣ឆ្នាំ រស់នៅភូមិ ឃុំកើតហេតុខាងលើ។ តាមចម្លើយសារភាពរបស់ជនសង្ស័យបានឲ្យដឹងថា ខ្លួន (ជនសង្ស័យ) បានខឹងនឹងឪពុកបង្កើតរបស់ខ្លួន ដោយបានយកមាន់ជល់ដែលខ្លួនបានចិញ្ចឹម យកទៅលក់ ដោយមិនបានប្រាប់ខ្លួនឲ្យដឹង ហើយនូវពេលខ្លួនសួរនាំក៏ត្រូវឪពុកស្ដីបន្ទាសថែមទៀត។
មន្ដ្រីនគរបាលអធិការក្រុងកំពត បានឲ្យដឹងទៀតថា ដោយសារខឹងនឹងឪពុកស្ដីបន្ទាស និង លក់មាន់ជល់របស់ខ្លួនផង ជនសង្ស័យក៏បានយកពូថៅកាប់ប្រហារទៅលើឪពុកបង្កើតរបស់ខ្លួនបណ្តាលឲ្យរបួសបាក់ឆ្អឹងកដៃ និងដាច់សរសៃម្រាមកូនដៃ និងនាងដៃ ត្រូវបានអ្នកជិតខាងដឹកយកទៅសង្គ្រោះ នៅមន្ទីរពេទ្យសម្ភពបូកគោ។
បច្ចុប្បន្ន ជនសង្ស័យត្រូវបានសមត្ថកិច្ចជំនាញកសាងសំណុំរឿង បញ្ចូនទៅតុលាការចាត់ការតាមនីតិវិធី៕
មតិយោបល់