បាត់ដំបង: យោងតាមផេក នាយកដ្ឋានផ្សពផ្សាយអប់រំ បានឲ្យដឹងថាទាំងស្រុងថា ៖ នៅថ្ងៃទី៧ ខែកុម្ភ: ឆ្នាំ២០១៨ នេះ វេលាម៉ោង៤និង៤០នាទីល្ងាច ក្រុមត្រួតពិនិត្យការបង់ពន្ធ លើមធ្យោបាយ ដឹកជញ្ជូន និងយានជំនិះគ្រប់ប្រភេទសម្រាប់ឆ្នាំ២០១៧បានចុះត្រួតពិនិត្យ នៅចំណុច ភូមិអូរសណ្តាស ឃុំកំពង់ព្រាងស្រុកសង្កែ ក្នុងខេត្តបាត់ដំបង ហើយបានចាប់ឃាត់រថយន្តToyota Prius មួយគ្រឿង ពាក់ស្លាកលេខ 05 019362 ប្រភេទទេសចរណ៍ ពណ៌ក្រហម ផលិតឆ្នាំ២០០៥ ជាកម្មសិទ្ធិ លោកឡៃ លាវ មានទីលំនៅភូមិ ទួលពង្រ ឃុំសង្កាត់ពង្រ ស្រុកម៉ាឡៃ ខេត្តបន្ទាយមានជ័យ ដែលខកខានមិនបានបង់ពន្ធលើយានយន្តចំនួន៣ឆ្នាំ និងត្រូវបង់ប្រាក់ពន្ធនិងប្រាក់ពិន័យចំនួន ៣២ម៉ឺនរៀល។
ប្រភពព័ត៌មានពីកន្លែង កើតហេតុបានឲ្យដឹងថារថយន្តព្រូស១គ្រឿង បើកបរលើដងផ្លូវជាតិលេខ៥ទិសដៅ ពីភ្នំពេញ មកខេត្តបន្ទាយមានជ័យ លុះដល់កន្លែងត្រួតពិនិត្យរបស់ក្រុមចល័តពន្ធដារ ស្ថិតក្នុងភូមិអូរសណ្តាស ក្នុងខេត្តបាត់ដំបង គេសង្កេតឃើញថា មានកើតជម្លោះ រវាងម្ចាស់រថយន្តPriusនិងក្រុមចល័តពន្ធដារ ប្រើប្រាស់វោហារសាស្ត្រ ធ្ងន់ៗដាក់គ្នា ដោយមានថតវីដេអូរាងៗខ្លួន ដើម្បីបង្ហាញដល់សាធារណជនផងដែរ។ ក្រោយពី តតាំងជាមួយគ្នា មួយរយ: ឃើញថាសភាពការណ៍មិនធូរស្បើយ ខាងសមត្ថកិច្ចពន្ធដារ បានស្នើសុំមន្ត្រីនគរបាលចរាចរណ៍ចុះធ្វើអន្តរាគមន៍ និងបាន ស្ទួចរថយន្ត Prius មកកាន់ស្នងការដ្ឋាននគរបាលខេត្តបាត់ដំបង ធើ្វការដោះស្រាយ។
ក្រោមការណែនាំ បំភ្លឺពីសំណាក់សមត្ថកិច្ចនគរបាលចរាចរណ៍ផ្លូវគោក ខេត្តបាត់ដំបង លោកអនុសេនីយ៍ឯក ឈៀង រុង រួចមក ម្ចាស់រថយន្ត បានស្គាល់កំហុស ស្នើសុំឲ្យសមត្ថកិច្ចពន្ធដារ ធ្វើការពិន័យតាមច្បាប់ចុះ។
ឆ្លើយតបចំពោះ សំណើរបស់ម្ចាស់រថយន្ត លោក ទូច សុទ្ធី អនុប្រធាន ពន្ធដារ បានគូសបញ្ជាក់ថា លោកមិនចង់ដោះស្រាយបញ្ហានោះទេ! ប៉ុន្ដែរាត្រីម៉ោង១១ជិតកន្លះហើយ system លែងដំណើរការហើយ រង់ចាំភ្លឺសិន ឥឡូវ លោកប្រគល់ ភារកិច្ច ការពារ រថយន្តនេះជូនមន្ត្រីនគរបាលចរាចរណ៍សិន ដើម្បីធ្វើការដោះស្រាយនៅព្រឹកថ្ងៃទី៨ខែកុម្ភ:នេះ។
សូមបញ្ជាក់ផងដែរ មូលហេតុធ្វើឲ្យសមត្ថកិច្ចពន្ធដារផាកពិន័យ មកពីម្ចាស់រថយន្តមិនមាន លិខិតស្នាមបទដ្ឋានច្បាប់ត្រឹមត្រូវ នឹងប្រើប្រាស់វោហារសព្ទបង្ក អរិយភាពនាំឲ្យប៉ះពាល់ដល់ការអនុវត្តន៍ច្បាប់ក្នុងការប្រមូលពន្ធចូលរដ្ឋ៕
មតិយោបល់