(ភ្នំពេញ)៖ ក្មេងប្រុសអាយុ ៦ឆ្នាំ ម្នាក់ ត្រូវបានស្លាប់បាត់បង់ជីវិត យ៉ាងអាណោចអាធម៌ ខណ: ម្តាយ នាំទៅជិះសេះលេង នៅកន្លែងក្មេងលេងកម្សាន្ត ជាន់ផ្ទាល់ដី ក្នុងផ្សារស្ទឹងមានជ័យថ្មី ហើយត្រូវខ្សែភ្លើង ឆ្លងចរន្តអគ្គិសនី ឆក់ធ្លាក់ ពីលើខ្នងសេះ នោះ។
ករណី បង្កការភ្ញាក់ផ្អើលកើតឡើងកាលពីវេលាម៉ោង០១ និង ៤៥នាទី ថ្ងៃត្រង់ ថ្ងៃទី១១ ខែមេសា ឆ្នាំ២០១៦ នៅកន្លែងកម្សាន្ត សម្រាប់ក្មេងលេង ជាន់ផ្ទាល់ដី ផ្សារស្ទឹងមានជ័យថ្មី ផ្លូវព្រះមុនីរ៉េត ក្នុងសង្កាត់ស្ទឹងមានជ័យ ខណ្ឌមានជ័យ។
តាមប្រភពពីមន្ត្រីនគរបាល បានឱ្យដឹងថា ក្មេងប្រុសរងគ្រោះមានឈ្មោះ ឌី អ៊ីនដ្រា អាយុ ៦ឆ្នាំ ជាសិស្ស ស្ត្រីជាម្តាយមានឈ្មោះ ឆន ពិសី អាយុ ២៧ឆ្នាំ មានមុខរបរជាកម្មការិនីរោងចក្រ ស្នាក់នៅផ្ទះគ្មានលេខ ផ្លូវលំ ភូមិទួលពង្រ សង្កាត់ចោមចៅ ខណ្ឌពោធិសែនជ័យ។ មុនពេលកើតហេតុ ស្ត្រីជាម្តាយបាននាំកូនប្រុសរបស់គាត់ មកលេងនៅក្នុងផ្សារស្ទឹងមានជ័យ ដោយបានយកទៅឱ្យជិះសេះលេង នៅកន្លែងក្មេងលេងខាងលើ សុខៗ ក៏ស្រាប់តែ បានឃើញក្មេងប្រុសរងគ្រោះ ធ្លាក់ពីលើខ្នងសេះ។
តាមប្រភពដដែល បានប្រាប់បន្តទៀតថា ពេលដែលបានឃើញកូនប្រុសរបស់ខ្លួន ធ្លាក់ពីលើខ្នងសេះនោះហើយ ស្ត្រីជាម្តាយ ក៏បានស្ទុះទៅលើកូន ក៏ស្រាប់បានឃើញកូន មានស្ថានភាពស្លេកស្លាំង និងសន្លប់ បាត់ស្មារតីទៅហើយ ភ្លាមនោះ ក៏បានបញ្ជូនដាក់ម៉ូតូរ៉ឺម៉កកង់បី បញ្ជូនយកទៅសង្គ្រោះ នៅមន្ទីរពេទ្យ មិត្តភាពខ្មែរ សូវៀត តែត្រូវក្រុមគ្រូពេទ្យប្រាប់ថា ក្មេងប្រុសរងគ្រោះ បានដាច់ខ្យល់ស្លាប់បាត់ទៅហើយ។
ក្រោយពេលកើតហេតុ កម្លាំងសមត្ថកិច្ចជំនាញ ក៏បានចុះទៅធ្វើកោសល្យវិច័យ ទៅលើសពកុមាររងគ្រោះ បានបញ្ជាក់ថា ពិតជាបានស្លាប់បាត់បង់ជីវិតដោយសារតែឆក់ខ្សែភ្លើងពិតប្រាកដមែន ទើបប្រគល់ទៅឱ្យក្រុមគ្រួសារបញ្ជូនយកទៅធ្វើបុណ្យទៅតាមប្រពៃណី និងចុះទៅធ្វើការត្រួតពិនិត្យឃើញថា ទីតាំងខាងលើបានការតខ្សែ ភ្លើងខុសបច្ចេកទេស ទើបបណ្តាលឱ្យមានហេតុការណ៍នេះកើតឡើង បានបែបនេះ៕
មតិយោបល់