ភ្នំពេញៈ រថយន្តដឹកមាន់១គ្រឿង ដោយសារតែអ្នកបើកបរស្រវឹងស្រាបានបើកជ្រុលទៅបុករថយន្តធុនត្រា១គ្រឿងដែលគេចតទុកស្ងៀម បណ្ដាលឲ្យរងការខូចខាត រួចបានបន្តទៅបុកចូលកន្លងលក់ឱសថនិងភេសជ្ជៈមួយកន្លង ព្រមទាំងកៀរលោកតាអាចារ្យម្នាក់ រងរបួសជើងថែមទៀតផង។

ហេតុការណ៍នោះបានកើតឡើងកាលពីវេលាម៉ោង១១និង២៥នាទីថ្ងៃត្រង់ទី០២ ខែមីនា ឆ្នាំ២០១៨ នៅតាមផ្លូវវ៉េងស្រេង ភូមិត្រពាំងថ្លឹង សង្កាត់ចោមចៅ ខណ្ឌពោធិ៍សែនជ័យ។

តាមប្រភពព័ត៌មានបានឲ្យដឹងថា នៅមុនពេលកើតហេតុ មានរថយន្តដឹកមាន់១គ្រឿងម៉ាកគា ពណ៌ស ពាក់ស្លាកលេខ ភ្នំពេញ2W-9364 បានបើកបរដោយឈ្មោះ ហោង រ៉ាង អាយុ២២ឆ្នាំ មានទីលំនៅភូមិរកា ឃុំរការ ស្រុកកណ្តាលស្ទឹង ខេត្តកណ្ដាល។ បានធ្វើដំណើរក្នុងទិសដៅពីកើតទៅលិចលុះពេលទៅដល់ត្រង់ចំណុចកើតហេតុខាងលើ ដោយសារតែអ្នកបើកបរស្រវឹងបានរេចង្កូតជ្រុលទៅបុករថយន្តធុនត្រា កំពុងចតស្ងៀម១គ្រឿង ពណ៌ខ្មៅ ពាក់ស្លាកលេខ ភ្នំពេញ2AC-3579។

ប្រភពដដែលបានបន្តទៀតថា ខណៈនោះបានបណ្ដាលឲ្យរថយន្តធុនត្រារងការខូចខាត ហើយរថយន្តបង្កបានជ្រុលទៅកៀរលោកតាអាចារ្យ ម្នាក់បណ្ដាលឲ្យរងរបួសជើង រួចទើបជ្រុលបន្តទៅបុកចូលឱសថស្ថាននិងលក់ភេសជ្ជៈយីហោ វិមានឯករាជ្យ ទៀតទើបឈប់ប៉ុន្តែមិនបានបណ្ដាលឲ្យអ្នកនៅក្នុងឱសថស្ថាននោះរងរបួសឡើយ។ បន្ទាប់មកអ្នកបើកបរត្រូវបានប្រជាពលរដ្ឋនាំគ្នាដេញចាប់បានប្រគល់ជូននគរបាលដើម្បីសួរនាំនិងចាត់ការតាមច្បាប់។ ចំណែកលោកតាអាចារ្យ រងគ្រោះ ឈ្មោះ នួន ផាន អាយុ៥៩ឆ្នាំស្នាក់ក្នុងសង្កាត់ស្ទឹងមានជ័យ និងមានស្រុកកំណើតនៅជិតវត្តប្រហ៊ូត ស្រុកមេសាងខេត្តព្រៃវែង រងរបួសជើង៕