ភ្នំពេញ: ជនសង្ស័យម្នាក់ ក្នុងចំណោម២នាក់ ត្រូវបានប្រជាពលរដ្ឋចាប់ប្រគល់ទៅឲ្យសមត្ថកិច្ច បន្ទាប់ពីបានធ្វើសកម្មភាពឆក់ទូរសព្ទដៃពីនារី២នាក់បងប្អូនបានសម្រេច រួចក៏ដួលម៉ូតូ បណ្តាលឲ្យជនសង្ស័យម្នាក់យកទូរសព្ទរបស់ជនរងគ្រោះរត់គេចខ្លួនបាត់ស្រមោល។

ហេតុការណ៍នេះកើតឡើងកាលពីវេលាម៉ោង១១និង៣០នាទីយប់ ថ្ងៃទី៤ ខែកុម្ភ: ឆ្នាំ២០១៨ ត្រង់ចំណុចក្បែរប៉ុស្តិ៍នគរបាលរដ្ឋបាលទឹកល្អក់ទី៣ តាមបណ្តោយផ្លូវ១៨២ ស្ថិតក្នុងសង្កាត់ទឹកល្អក់ទី៣ ខណ្ឌទួលគោក រាជធានីភ្នំពេញ។

ជនរងគ្រោះទី១ ប្អូនដែលជាអ្នកបើកម៉ូតូមានឈ្មោះ ធា កញ្ញា ភេទស្រី អាយុ២៥ឆ្នាំ មុខរបរលក់ដូរ ស្នាក់ផ្ទះជួល ភូមិបឹងបាយ៉ាប សង្កាត់ភ្នំពេញថ្មី ខណ្ឌសែនសុខ។ ទី២ បងដែលជាម្ចាស់ទូរសព្ទដៃមានឈ្មោះ ធា ស្រីមុំ ភេទស្រី អាយុ២៧ឆ្នាំ លក់ដូរដូចគ្នា និងស្នាក់នៅជាមួយគ្នា។

ចំណែកឯជនសង្ស័យមានឈ្មោះ តាំង អមត: ភេទប្រុស អាយុ២២ឆ្នាំ មុខរបរមិនពិតប្រាកដ ស្នាក់នៅបន្ទប់ជួល ម្តុំត្រឡោកបែក សង្កាត់ទឹកល្អក់ទី១ ខណ្ឌទួលគោក មានស្រុកកំណើតនៅភូមិអំពិលតិក ឃុំកំពងភ្នំ ស្រុកលើកដែក ខេត្តកណ្តាល។ចំណែកជនសង្ស័យម្នាក់ទៀត ឈ្មោះ យីប ជាម្ចាស់ម៉ូតូរត់គេចខ្លួនបាត់។

បើកតាមសម្តីពីនារីរងគ្រោះបានរៀបរាប់ប្រាប់ឲ្យដឹងថា នៅមុនពេលកើតហេតុនារីរងគ្រោះទាំង២នាក់បងប្អូនបានជិះម៉ូតូមួយគ្រឿងម៉ាក ហុងដាឌ្រីម ស៊េរី៧ ពណ៌ខ្មៅ ពាក់ស្លាកលេខ កំពង់ស្ពឺ 1C-1634 ដែលទើបតែជិះចេញមកពីផ្ទះបំណង់ជិះទៅទិញបន្លែនៅផ្សារដើមគ ដោយធ្វើដំណើរតាមបណ្តោយផ្លូវ១៨២ ក្នុងទិសដៅពីលិចទៅកើត។ លុះមកដល់ចំណុចកើតហេតុស្រាប់តែលេចមុខជនសង្ស័យខាងលើ២នាក់បានជិះម៉ូតូមួយគ្រឿងម៉ាក ស៊ុយសូគីលេត ពណ៌ទឹកប្រាក់ ពាក់ស្លាកលេខ កណ្តាល 1W-7228 ជិះមកពីក្រោយហើយក៏បានធ្វើសកម្មភាពឆក់ទូរសព្ទដៃមួយគ្រឿងម៉ាក សាំងសុង ពីនារីរងគ្រោះដែលមានឈ្មោះ ធា ស្រីមុំ ត្រូវជាបងនៅអង្គុយខាងក្រោយ កំពុងតែលេងហ្វេសប៊ុក បានសម្រេច ហើយបម្រុងនិងជិះម៉ូតូរត់គេចខ្លួនតែក៏បានទាក់ដៃចង្កូតជាមួយនិងម៉ូតូរងគ្រោះបណ្តាលឲ្យម៉ូតូរបស់ជនរងគ្រោះនិងម៉ូតូជនសង្ស័យដួល ភ្លាមៗនេះជនសង្ស័យខាងលើដែលជាអ្នកធ្វើសកម្មភាពឆក់ត្រូវបានប្រជាពលរដ្ឋដែលឃើញហេតុការណ៍បានជួយចាប់ឃាត់ខ្លួនរួមទាំងម៉ូតូមួយគ្រឿង។ ចំណែកឯបក្ខពួកម្នាក់ទៀតដែលជាអ្នកបើកម៉ូតូបានយកទូរសព្ទរបស់ជនរងគ្រោះដែលឆក់បានរត់គេចខ្លួនបាត់ស្រមោល។

បច្ចុប្បន្នជនសង្ស័យខាងលើ ត្រូវបានប្រជាពលរដ្ឋប្រគល់ទៅឲ្យសមត្ថកិច្ចនាំខ្លួនទៅសាកសួរនាំនៅប៉ុស្តិ៍នគរបាលរដ្ឋបាលទឹកល្អក់ទី៣ ដើម្បីកសាងសំណុំរឿងបញ្ជូនខ្លួនទៅអធិការដ្ឋាននគរបាលខណ្ឌទួលគោករង់ចាំចាត់ការទៅតាមនិតិវិធីច្បាប់។ ចំណែកជនរងគ្រោះបានមកដាក់បណ្តេឹងនៅប៉ុស្តិ៍នគរបាលរដ្ឋបាលសង្កាត់ទឹកល្អក់៣ដើម្បីឲ្យសមត្ថកិច្ចស្វែងរកចាប់ខ្លួនបក្ខពួកម្នាក់ទៀតមកផ្តន្ទាទោសទៅតាមផ្លូវច្បាប់៕