ភ្នំពេញៈ យោងតាមសមត្ថកិច្ចនគរបាលព្រហ្មទណ្ឌ​កម្រិតធ្ងន់ នៃស្នងការដ្ឋាននគរបាលរាជធានីភ្នំពេញ បានឲ្យដឹងនៅព្រឹកថ្ងៃទី៧ ខែមីនា ឆ្នាំ២០១៨នេះ ថា លោក ឌុច សុខសារិន ចៅក្រមស៊ើបសួរ នៃសាលាដំបូងរាជធានីភ្នំពេញ កាលពីថ្ងៃទី៥ ខែមីនា ឆ្នាំ២០១៨កន្លងទៅ បានសម្រេចចេញដីកាបង្គាប់ឲ្យឃុំខ្លួន ចោរវ័យក្មេងម្នាក់ នៅពន្ធនាគារជាបណ្តោះអាសន្នដើម្បីរង់ចាំបន្តនីតិវិធីនាពេលក្រោយ។

សមត្ថិច្ចបានឲ្យដឹងថា​ លោក ខាំ សុផារី ជាតំណាងអយ្យការបានបើកការស៊ើបសួរ និងសម្រេចចោទប្រកាន់លើ ឈ្មោះ​ សួន ដារ៉ូ ហៅតាក់ ភេទប្រុស អា​យុ ២២ឆ្នាំ​ មុខរបរចោរ ស្នាក់នៅ​បន្ទប់ជួល ផ្លូវរថភ្លើងសង្កាត់​ទឹកថ្លា ខណ្ឌសែនសុខ រាជធានីភ្នំពេញ ពីបទលួច ម៉ូតូរបស់ជនរងគ្រោះ ឈ្មោះ​ កៅ សុខឃាង ភេទប្រុស អាយុ៣៩ឆ្នាំ ​ប្រព្រឹត្តកាលពីថ្ងៃទី១ ខែមីនា ឆ្នាំ២០១៨ នៅចំណុចផ្ទះជួលគ្មានលេខ ផ្លូវលំ ក្រុម២ ភូមិ​មានជ័យ សង្កាត់ស្ទឹងមានជ័យទី២ ខណ្ឌមានជ័យ រាជ​ធា​នី​ភ្នំពេញ យោងតាមមាត្រា ៣៥៣ និងមាត្រា ៣៥៦ នៃក្រមព្រហ្មទណ្ឌ។

សូមបញ្ជាក់ថា សមត្ថកិច្ចនគរបាលព្រហ្មទណ្ឌ​កម្រិតធ្ងន់ នៃស្នងការដ្ឋាននគរបាលរាជធានីភ្នំពេញ បានខ្លួនជនសង្ស័យខាងលើ កាលពីយប់ថ្ងៃទី២ ខែមីនា ឆ្នាំ​២០១៨ នៅចំណុចគល់ស្ពានអាកាសស្ទឹងមានជ័យ ក្រោយពីទទួលបានពាក្យបណ្តឹងរបស់ជនរងគ្រោះ ថាបានបាត់ម៉ូតូម៉ាក វ៉េវ សេ១១០ ពណ៌ខ្មៅ ពាក់ស្លាកលេខ ភ្នំពេញ 1CO-5567 កាលពីល្ងាចថ្ងៃទី១ ខែមីនា ឆ្នាំ២០១៨ នៅចំណុចផ្ទះជួលរបស់ខ្លួនខាងលើ៕

https://youtu.be/U8NIvw1O_9c