ព័ត៌មានជាតិ

តំណាងអយ្យការសម្រេចចោទប្រកាន់ជនជាតិ កុងហ្គោ ៣នាក់ ពាក់ព័ន្ធរឿងប្រើឯកសារក្លែងក្លាយ

ភ្នំពេញ: បើយោងតាមលោក លី សុផាណា អ្នកនាំពាក្យអយ្យការអមសាលាដំបូងរាជធានីភ្នំពេញ បានថ្លែងប្រាប់ក្រុមអ្នកសារព័ត៌មានតាមប្រព័ន្ធ Telegram នៅមននេះបន្តិចថា នៅរសៀលថ្ងៃទី១៧ ខែមិថុនា ឆ្នាំ២០១៦នេះ លោក សៀង សុខ តំណាងអយ្យការបានសម្រេចចោទប្រកាន់បុរសជនជាតិ កុងហ្គោ ៣នាក់ពីបទ ប្រើប្រាស់ឯកសារសាធារណ:ក្លែង យោងតាមមាត្រា ៦៣០នៃក្រមព្រហ្មទណ្ឌ។ អ្នកនាំពាក្យរូបនេះបន្តថា បន្ទាប់ពីសួរចម្លើយ និងពិនិត្យឯកសារសំណុំរឿង អយ្យការបានសម្រេច បញ្ជូនទៅចៅក្រមសើបសួរដើម្បីចាត់ការបន្តនៅថ្ងៃស្អែក។

ជនត្រូវចោទរួមមានទី១ឈ្មោះ Emmanuel Ngoma Ngoma Coco ទី២ឈ្មោះ Junior Bin Mungomba និងទី៣ឈ្មោះ Mesiya Tedike Junior ។

យោងតាមប្រភពពីសមត្ថកិច្ច កាលពីថ្ងៃទី១៥ ខែមិថុនា ឆ្នាំ២០១៦កន្លងទៅ កម្លាំងសមត្ថកិច្ចនាយកដ្ឋានប្រឆាំងភេរវកម្ម និងឧក្រិដ្ឋកម្មឆ្លងដែន បានឃាត់ខ្លួនបុរសជាជនជាតិ កុងហ្គោ ម្នាក់ឈ្មោះ Emmanuel Ngoma Ngoma Coco ខណ:បុរសរូបនោះ បានយកលិខិតឆ្លងដែលមានរូបថតមនុស្សតែម្នាក់ ប៉ុន្តែមានសាវតាជាតិខុសគ្នាទៅបើកលុយនៅស្ថាប័នមីក្រូហិរញ្ញវត្ថុ ស្ថាបនា សាខាបាក់ទូក។ ប្រភពបន្តថា ដោយមើលឃើញភាពមិនប្រក្រតីបែបនេះ ទើបបុគ្គលិកស្ថាប័នខាងលើបានរាយការណ៍ជូនសមត្ថកិច្ចដើម្បីឃាត់ខ្លួន រហូតឈានដល់ឃាត់បានបក្ខពួកជនសង្ស័យ បាន២នាក់បន្ថែមទៀត នៅថ្ងៃទី២៦ ខែមិថុនា ឆ្នាំ២០១៦ម្សិលមិញ។

ប្រភពដដែលបានបញ្ជាក់ថា ក្រោយសាកសួរ និងពិនិយ្យមើលឯកសារជនសង្ស័យទាំង៣នាក់ទំនងជា មានអ្នកផ្ញើលុយខ្មៅមកពីបរទេស ដោយឱ្យពួកគេរងចាំទទួលនៅក្នុងប្រទេសកម្ពុជា។ ក្រោយកសាងសំណុំរឿងចប់សព្វគ្រប់កម្លាំងសមត្ថកិច្ចបានបញ្ជូនជនសង្ស័យ និងវត្ថុតាងមកអយ្យការអមសាលាដំបូងរាជធានីភ្នំពេញដើម្បីចាត់ការបន្តតាមនីតិវិធី៕

មតិយោបល់