Post News Media ព័ត៌មានជាតិ គេចទៅណា ក៏មិន...

គេចទៅណា ក៏មិនរួចពីសំណាញ់ច្បាប់ទ្បើយ! ជនសង្ស័យ៣នាក់ ត្រូវសមត្ថកិច្ចចាប់ចូលប៉ុស្ដិ៍

ព្រះសីហនុ: តាមសមត្ថកិច្ច បាន​ឲ្យ​ដឹង​ថា មាន​ករណីអំពើ​ចោរ​កម្ម​លួច​កាច់​សោរ​យក​ម៉ូតូ​មួយ​គ្រឿង​ ​ម៉ាក ស្កុប​ពី​ពណ៌ស​ ផលិត ឆ្នាំ២០១៧ គ្មានស្លាកលេខ​ កាលពីវេលាម៉ោង១០ព្រឹក​ថ្ងៃទី ២១ ខែមេសា ឆ្នាំ២០១៨ ដែល​ម្ចាស់​បាន​ទុក​នៅ​មុខ​ផ្ទះ​ ក្រុម២៤ ភូមិទី​២ សង្កាត់​លេខ ៤ ក្រុង និងខេត្តព្រះសីហនុ​ ។

ប្រភពដដែលបាន​បន្ថែម​ថា ក្រោយ​ពេលទទួល​បាន​ដំណឹង​នេះភ្លាម​ សមត្ថកិច្ច​ជំនាញ​ព្រហ្មទណ្ឌ​ គ្រប់​ផ្នែក​ស្រុក​ក្រុង​ទាំង​អស់​ បានសហការ​គ្នា​ បើក​ការ​ស៊ើប​អង្កេត​ ដើម្បីរុក​រក​មុខ​សញ្ញា​ជា​បន្ទាន់​។

ជា​លទ្ធផល​នៅ​វេលាម៉ោង១ និង១៥ នាទីរសៀល​ថ្ងៃ​ដដែល​ គឺ​ប្រមាណ​ជា​ ៣ម៉ោង ក្រោ​យ​កើតហេតុប៉ុណ្ណោះ​ ​សមត្ថកិច្ចបានស្ទាក់​ចាប់​មុខសញ្ញា​បាន​ នៅចំណុចស្ពានទឹកសាប ភូមិស្មាច់ដែង ឃុំរាម ​ ដែល​មុខ​សញ្ញា​ បាន​ដឹក​ម៉ូតូ​តាម​រថយន្ត​កាម​រី​ ឆ្លាមពណ៌​ប្រផេះ​ មួយ​គ្រឿង​ យក​ទៅ​ភ្នំពេញ​ ។

ជនរងគ្រោះដែលជាម្ចាស់ម៉ូតូ ឈ្មោះ សុខ ស្រីស ភេទស្រី អាយុ ២៥ឆ្នាំ មុខរបរ បុគ្គលិកកាស៊ីណូ ស្នាក់នៅ ភូមិ២ សង្កាត់៤ ក្រុងព្រះសីហនុ ។ រីឯជនសង្ស័យ​មានគ្នា​បី​នាក់៖ ទី១.​ឈ្មោះ ជា លក្ខណ:បញ្ញា ហៅ ម៉ិញ ភេទប្រុស អាយុ ២៦ឆ្នាំ មុខរបរ អ្នកនាំភ្ញៀវ ស្នាក់នៅផ្ទះជួល ភូមិ២ សង្កាត់២ ក្រុង-ខេត្តព្រះសីហនុ (សហចារី) ទី២.ឈ្មោះ សុំ រ៉ាវី ភេទប្រុស អាយុ ២៥ឆ្នាំ មុខរបរ មិនពិតប្រាកដ ស្នាក់នៅផ្ទះជួល ភូមិ២ សង្កាត់២ក្រុងខេត្តព្រះសីហនុ (សហចារី) និងទី៣.ឈ្មោះ ពៅ ណាឃីម ភេទប្រុស អាយុ ២៣ឆ្នាំ មុខរបរ មិនពិតប្រាកដ ស្នាក់នៅផ្ទះជួល ភូមិ២ សង្កាត់២ ក្រុង-ខេត្តព្រះសីហនុ (សហចារី)។

វត្ថុតាងដកហូតបាន រួម​មាន​៖ ម៉ូតូម៉ាកស្កុបពី ពណ៌សផលិត ឆ្នាំ២០១៧​ មួយ​គ្រឿង​ គ្មានស្លាកលេខ និង​រថយន្តកាម​រី​ឆ្លាម មួយគ្រឿងពាក់ស្លាកលេខ ភ្នំពេញ 2L-0120 ។

បច្ចុប្បន្នជនសង្ស័យទាំងបីនាក់ និងវត្ថុតាង នគរបាលកំពុងកសាងសំណុំរឿង ដើម្បីចាត់ការបន្តតាមនិតិវិធីច្បាប់៕