ព័ត៌មានជាតិ

ចាក់ប្រហារគ្នាដូចកុនហូលីវូដ លទ្ធផលម្នាក់ដេកពេទ្យ ម្នាក់ទៀតដេកគុក

កណ្តាល: ករណីហិង្សា​ដោយ​ចេនា ខណ:​ជនរងគ្រោះបានទាញខោអាវរបស់ជនល្មើសចេញ ដើម្បីយករ៉ូលឡូភ្លើងដោតកង្ហា ​ស្រាប់​តែ​ជនល្មើសបានមកឃើញក៏បានជេរម្រាយជនរងគ្រោះ ​ក៏បង្ក​ជាជម្លោះ​វាយកាប់​ប្រហារ​គ្នាដូចរឿង​ហុងកុង​ បណ្តាល​ឲ្យជន​រងគ្រោះ​របួសធ្ងន់ កាល​ពីវេលាម៉ោង៨និង៤០នាទីថ្ងៃទី២១ ខែមិថុនា ឆ្នាំ២០១៦ នៅ​ចំណុចយានដ្ឋាន ជាម ម៉េងឈាង១ ភូមិថ្មី១ សង្កាត់តាខ្មៅ ក្រុងតាខ្មៅ ខេត្តកណ្តាល។

ប្រភព​ឲ្យដឹងថា ជនរងគ្រោះឈ្មោះ ម៉ៅ ព្រួញ ភេទប្រុស អាយុ២៤ឆ្នាំ ជនជាតិមុខរបរជាងជួសជុលរថយន្ត ខ្មែរទីលំនៅកំណើត ភូមិស្វាយកង់ ឃុំអន្លង់វិល ស្រុកសង្កែ ខេត្តបាត់ដំបង។ ទីលំនៅបច្ចុប្បន្ន ស្នាក់នៅក្នុងយានដ្ឋានកើតហេតុខាងលើ។ ចំណែក​ ជនល្មើសឈ្មោះ ឆន មាន ភេទប្រុស អាយុ១៧ឆ្នាំ ជនជាតិខ្មែរ មុខរបរជាងជួសជុលរថយន្ត មាន​ស្រុកកំណើត​ភូមិបុណ្យ ឃុំត្នោត ស្រុកកំពង់រោរិ៍ ខេត្តស្វាយរៀង។ ទីលំនៅបច្ចុប្បន្ន ស្នាក់នៅក្នុងយានដ្ឋានជាមម៉េងឈាង១ ភូមិថ្មី១ សង្កាត់តាខ្មៅ ក្រុងតាខ្មៅ ខេត្តកណ្តាល។

ក្រោយ​កើត​ហេតុ វត្ថុតាងដកហូតបាន​រួមមាន​៖ ដែកត្បែងចុងសំប៉ែកចំនួន០១ប្រវែង៥០សង់ទីម៉ែត្រ(របស់ជនរងគ្រោះ) និង​ដែកឆាបចុងស្រួចចំនួន០១ប្រវែង១៨សង់ទីម៉ែត្រ(របស់ជនល្មើស)។

​គួរ​បញ្ជាក់ថា នៅវេលាកើតហេតុខាងលើ ជនរងគ្រោះបានទាញខោអាវរបស់ជនល្មើសចេញ (ដេកបន្ទប់ជាមួយគ្នា) ដើម្បីយករ៉ូលឡូភ្លើងដោតកង្ហា ពេលនោះជនល្មើសបានមកឃើញក៏បានជេរម្រាយជនរងគ្រោះ ហើយបានទាក់ពាក្យសម្តី​គ្នារហូតដល់មានការវាយប្រតាយប្រតប់គ្នាទៅវិញទៅមក ដោយជនល្មើសប្រើដែកឆាប រីឯជនរងគ្រោះប្រើដែកត្បែងវាយទៅវាយមក បណ្តាលឲ្យជនរងគ្រោះរងរបួសបួនកន្លែង (ថ្ពាល់ខាងស្តាំ ដើមដៃខាងស្តាំ ស្មាខាងឆ្វេង និងម្រាមដៃខាងឆ្វេង) រីឯជនល្មើសរងរបួសដៃ និងលើផ្ទៃពោះ)។ ខណ:​នោះ សមត្ថកិច្ចបានចុះអន្តរាគមន៍ឃាត់ខ្លួនជនល្មើសមកប៉ុស្តិ៍នគរបាលរដ្ឋបាលតាខ្មៅ ដើម្បីធ្វើការសាកសួរ។

នៅចំពោះមុខសមត្ថកិច្ចជនល្មើសបានឆ្លើយសារភាពថា ខ្លួនពិតជាបានវាយតប់គ្នាទៅវិញទៅមកជាមួយជនរងគ្រោះពិតប្រាកដមែន។ ចំពោះគ្រឿងញៀនវិញ ឈប់ប្រើប្រាស់មួយរយ:មកហើយ។

​បច្ចុប្បន្ន ជន​សង្ស័យ​ត្រូវ​បាន​បញ្ជូន​ខ្លួន រួមនឹង​​វត្ថុតាងមកកាន់អធិការដ្ឋាននគរបាលក្រុងតាខ្មៅ ដើម្បីកសាងសំណុំរឿងតាមនីតិវិធី៕


មតិយោបល់