បន្ទាយមានជ័យៈ បុរសម្នាក់ ជិះម៉ូតូទៅបុកជាមួយ រថយន្ដពីក្រោយពេញទំហឹង បណ្តាលឲ្យស្លាប់ខ្លួនឯង នៅនឹងកន្លែងកើតហេតុ កាលពីវេលាម៉ោង១០យប់ថ្ងៃទី២២ ខែមិថុនា ឆ្នាំ២០១៦ នៅតាមផ្លូវជាតិលេខ៦ ត្រង់ចំណុចភូមិព្រៃមាន់ ឃុំរហាល ស្រុកព្រះនេត្រ ខេត្តបន្ទាយមានជ័យ។
អាវុធហត្ថស្រុកព្រះនេត្រព្រះ បានឲ្យដឹងថា ជនរងគ្រោះមានឈ្មោះ អន សារ៉ាន់ ប្រុសអាយុ៣៣ឆ្នាំរស់នៅក្នុង ភូមិបន្ទាយកងពលលេខ៥១ ក្នុងភូមិភ្នំជញ្ជាំង ឃុំជប់វ៉ារី ស្រុកព្រះនេត្រព្រះ ខេត្តបន្ទាយមានជ័យ។
អាវុធហត្ថ បន្ដថា មុនពេលកើតហេតុនោះ មានម៉ូតូមួយគ្រឿងម៉ាកហុងដាឌ្រីមសេ១២៥ បិតតែមឆ្នាំ២០១៥ គ្មានស្លាកលេខ បើកមកពីកើតទៅលិចក្នុងល្បឿនលឿន ពេលបើកមកដល់ចំណុចកើតហេតុ ដោយសារតែមេឃងងឹតពេកមើលផ្លូវមិនឃើញស្រាប់តែបានទៅបុករថយន្តមិនស្គាល់ អត្តសញ្ញាណ ដែលកំពុងបើកពីខាងមុខក្នុងទិសដៅស្របគ្នាពេញមួយទំហឹង បណ្តាលឲ្យអ្នកបើកម៉ូតូស្លាប់ ភ្លាមមួយរំពេចនៅកន្លែងកើតហេតុ។
ក្រោមពីកើតហេតុ វត្ថុតាងមានរថយន្ត និងម៉ូតូជនរងគ្រោះត្រូវបានសមត្ថកិច្ចចរាចរណ៍ យកទៅរក្សាទុកនៅអធិការដ្ឋាននគរបាលស្រុកព្រះនេត្រព្រះ ដើម្បីស្រាវជ្រាវស្វែងរកម្ចាស់រថយន្ត ដើម្បីយកមកដោះស្រាយតាមនីតិវិធី៕
មតិយោបល់