Post News Media ព័ត៌មានជាតិ នៅខណ្ឌ៧មករា! ...

នៅខណ្ឌ៧មករា! ទំនាស់​ពាក្យក្នុងគ្រួសារ​ បុរសម្នាក់បើករថយន្តខេមរភូមិន្ទ​ 2-6565ផ្ទុះអាវុធ៣គ្រាប់ មិនរំខានសមត្ថកិច្ចឡើយ!

ភ្នំពេញ: បុរសម្នាក់បើករថយន្ត​ស្លាកលេខខេមរភូមិន្ទ​ មកឈប់មុខផ្ទះរួចស្រែកឡូឡា បន្ទាប់មកក៏បានដកកាំភ្លើងខ្លី១ដើម រួចបាញ់ឡើងលើចំនួន៣គ្រាប់ផ្ទួនៗគ្នា ហើយបើករថយន្តគេចចេញបាត់ស្រមោល ដែលបង្កឲ្យមានការ​ភិតភ័យនិងភ្ញាក់ផ្អើល​ដល់ប្រជាពលរដ្ឋរស់នៅជិតខាង​យ៉ាងខ្លាំងផងដែរ។

ករណីបាញ់បោះសេរីនេះបានកើតឡើងនៅពីវេលាម៉ោងជាង១០យប់ ថ្ងៃទី៧ ខែសីហា​ ឆ្នាំ២០១៨ ស្ថិតនៅផ្សារ​ឌុយម៉េច តាមបណ្ដោយផ្លូវ១០៩ ស្ថិតក្នុងសង្កាត់មនោរម្យ ខណ្ឌ៧មករា រាជធានីភ្នំពេញ។

ប្រភពព័ត៌មានពីអ្នករស់នៅជិតខាងប្រាប់ឲ្យដឹងថា នៅមុនកើតហេតុ​ គាត់បានឃើញបុរសម្នាក់បើករថយន្ត​ខេមរភូមិន្ទ​ 2-6565 មកឈប់មុខផ្ទះ រួចមានទំនាស់ពាក្យសម្ដីជាមួយក្រុមគ្រួសារ​ ហើយស្រែកឡូឡា មួយសន្ទុះក្រោយក៏បានដកកាំភ្លើងខ្លី១ដើម បាញ់ឡើងលើចំនួន៣គ្រាប់ផ្ទួនៗគ្នា រួចបើករថយន្តចេញទៅបាត់ស្រមោល ដែលបង្កឲ្យមានការ​ភិតភ័យនិងភ្ញាក់ផ្អើល​ដល់ប្រជាពលរដ្ឋរស់នៅជិតខាង​យ៉ាងខ្លាំងផងដែរ។

សូមបញ្ជាក់ផងដែរថាក្រោយពីបាញ់រួចក្រុមអ្នកសារព័ត៌មានយើងបានចុះទៅឃើញសំបកគ្រាប់កាំភ្លើងមិនស្គាល់ម៉ាក៣គ្រាប់នៅនឹងមុខផ្ទះផងដែរ តែក៏មានស្ត្រី​ម្នាក់ក៏បានរត់មកប្រមូលសំបកគ្រាប់យកទៅទុកក្នុងចូលផ្ទះដើម្បីគេចពីអ្នកការសែតផងដែរ​ ៕