ឃាត់ខ្លួនជនជាតិចិន ៣នាក់ ពីបទបង្កគ្រោះថ្នាក់ចរាចរណ៍ បណ្តាលឲ្យស្លាប់ និងរងរបួសអ្នកដទៃ ចំនួន៣ករណី ត្រៀមបញ្ជូនទៅសាលាដំបូងខេត្ត

ព្រះសីហនុៈ ករណីទី១៖ នៅវេលាម៉ោង ២ និង៣០នាទីរសៀលថ្ងៃទី១០ ខែសីហា ឆ្នាំ២០១៨ កម្លាំងការិយាល័យនគរបាល ចរាចរណ៍ផ្លូវគោក បានបញ្ជូនខ្លួនអ្នកបើកបររថយន្ត ជនជាតិចិន ឈ្មោះ WANG HUAN ភេទប្រុស អាយុ៣៨ឆ្នាំ កាន់លិខិតឆ្លងដែនលេខ E89930490 មុខរបរបុគ្គលិកកាស៊ីណូ ស្នាក់នៅភូមិ១ សង្កាត់២ ក្រុងព្រះសីហនុ ទៅកាន់សាលាដំបូងខេត្តព្រះសីហនុ ដើម្បីចាត់ចែងតាមនីតិវិធីច្បាប់ ដែលពាក់ព័ន្ធនឹងករណីគ្រោះថ្នាក់ចរាចរណ៍ កាលពីថ្ងៃទី០៨ ខែសីហា ឆ្នាំ២០១៨ ត្រង់ចំណុច កាស៊ីណូ ហ្គោលឌែន ស្ថិតនៅក្នុងភូមិ៤ សង្កាត់លេខ៤ ក្រុង/ខេត្តព្រះសីហនុ បើករថយន្តថយក្រោយ បុកទ្វារកញ្ចក់ និងបុកអ្នកថ្មើរជើងឈ្មោះ ហ៊ុន សុផល ភេទប្រុស អាយុ៥១ឆ្នាំ បណ្ដាលឲ្យរងរបួសជើងធ្ងន់។

ករណីទី២៖ នៅវេលាម៉ោង ៧ និង១០នាទីយប់ថ្ងៃទី៩ ខែសីហា ឆ្នាំ២០១៨ នៅលើផ្លូវជាតិលេខ៤ ចន្លោះគីឡូម៉ែត្រ ១៤៨-១៤៩ ស្ថិតនៅក្នុងភូមិគីរីវ័ន ឃុំស្ទឹងឆាយ ស្រុកកំពង់សិលា ខេត្តព្រះសីហនុ មានករណីគ្រោះថ្នាក់ចរាចរណ៍មួយ រវាងរថយន្ត១គ្រឿងម៉ាក HIGHLANDER ពណ៌ ទឹកប្រាក់ ពាក់ស្លាកលេខភ្នំពេញ2P-2033 បើកបរដោយឈ្មោះ FANG GUANG FENG ភេទ ប្រុស អាយុ ៤៣ឆ្នាំ ជនជាតិចិន កាន់លិខិតឆ្លងដែនលេខ EC3926985 មុខរបរ លក់ដូរ ស្នាក់នៅខណ្ឌសែនសុខ រាជធានីភ្នំពេញ មានទិសដៅពីភ្នំពេញ ឆ្ពោះមកខេត្តព្រះសីហនុ លុះដល់ចំណុចខាងលើ ក៏បានបុកនឹងម៉ូតូ ១គ្រឿងម៉ាក HONDA C125 ពណ៌ ខ្មៅ ពាក់ស្លាកលេខតាកែវ1F-1868 បើកបរដោយឈ្មោះ ទិត សុជា ភេទ ប្រុស អាយុ ៣១ឆ្នាំ មុខរបរ លក់តាប៉ែ មានទីលំនៅភូមិត្រពាំង ឃុំស្រែអំបិល ស្រុកស្រែអំបិល ខេត្តកោះកុង (ទិសដៅផ្ទុយគ្នា) បណ្ដាលឲ្យអ្នកបើកបរម៉ូតូខ្ទាតមកលើផ្លូវ ក៏មានរថយន្ត ១គ្រឿងទៀត ម៉ាក TOYOTA VIP ពណ៌ស ពាក់ស្លាកលេខភ្នំពេញ 2AB-3073 ជាកម្មសិទ្ធរបស់ក្រុមហ៊ុន មេគង្គអ៊ិចប្រេស អ្នកបើកបរមិនស្គាល់អត្តសញ្ញាណ បានកិនពីលើអ្នកបើកបរម៉ូតូបណ្តាលឲ្យស្លាប់ភ្លាមៗតែម្តង ។ ចំណែករថយន្តម៉ាក HIGHLANDER រត់គេច រហូតដល់ ចំណុចមុខរោចក្រតំបន់សេដ្ឋកិច្ចពិសេស ស្ថិតនៅក្នុងភូមិបិតត្រាង ឃុំបិតត្រាង ស្រុកព្រៃនប់ ខេត្តព្រះសីហនុ ត្រូវបានកម្លាំងប៉ុស្តិ៍រដ្ឋបាលឃុំបិតត្រាង ស្ទាក់ចាប់បានទាំងរថយន្ត និង អ្នកបើកបរបើកបរ ។ ចំណែកអ្នកបើកបររថយន្ត TOYOTA VIP រត់គេចខ្លួនបាត់ក្រោយពេលកើតហេតុ ។

+អ្នកបើកបររថយន្តឈ្មោះ FANG GUANG FENG ត្រូវសមត្ថកិច្ចបាននាំខ្លួនមកកាន់ការិយាល័យនគរបាលចរាចរណ៍ផ្លូវគោក ដើម្បីកសាងសំណុំរឿងបញ្ជូនទៅសាលាដំបូងខេត្ត ។
+វត្ថុតាងរថយន្តTOYOTA VIP និង ម៉ូតូ ១គ្រឿង បានយកមករក្សាទុកនៅអធិការដ្ឋាននគរបាលស្រុកកំពង់សីលា និងរថយន្តម៉ាក HIGHLANDER បានយកមករក្សាទុកនៅការិយាល័យនគរបាលចរាចរណ៍ផ្លូវគោក ។

ករណីទី៣៖ នៅវេលាម៉ោង១ និង១០នាទីទៀបភ្លឺ ឈានចូលថ្ងៃទី១០ ខែសីហា ឆ្នាំ២០១៨ លើផ្លូវឯករាជ្យ ត្រង់ចំណុចស្តុប៣៣៣ ស្ថិតក្នុងភូមិ៤ សង្កាត់លេខ៤ ក្រុង/ខេត្តព្រះសីហនុ មានករណីគ្រោះថ្នាក់ចរាចរណ៍មួយ ដោយរថយន្ត១គ្រឿងម៉ាក LEXUS RX300 ពណ៌ស ពាក់ស្លាកលេខព្រះសីហនុ2B-3687 បើកបរដោយឈ្មោះ CHENG GIMAN ភេទប្រុស អាយុ៣៥ឆ្នាំ ជនជាតិចិន សញ្ជាតិចិន កាន់លិខិតឆ្លងដែនលេខE00498881 (គ្មានប័ណ្ណបើកបរ និងមិនសហការជាមួយសមត្ថកិច្ច ក្នុងការពិនិត្យជាតិអាកុល ) មុខរបរលក់ដូរ ស្នាក់នៅភូមិ២ សង្កាត់លេខ២ ក្រុង/ខេត្តព្រះសីហនុ មានទិសដៅពីលិច ឆ្កោះទៅកើត ។ លុះមក ដល់ចំណុចកើតហេតុ បានបុកពីក្រោយរថយន្ត១ គ្រឿង ម៉ាក PORSCHE ពណ៌ស ពាក់ស្លាកលេខភ្នំពេញ 2AK-3336 អ្នកបើកបរដោយឈ្មោះ PERERA WPATABENDEGE S.N ភេទប្រុស អាយុ៣៥ឆ្នាំ ជនជាតិស្រីលង្កា សញ្ជាតិស្រីលង្កា កាន់លិខិតឆ្លងដែនលេខN6652131 មុខរបរអគ្គនាយកក្រុមហ៊ុន ស្នាក់នៅភូមិ១ សង្កាត់វាលវង់ ខណ្ឌ៧មករា រាជធានីភ្នំពេញ មានទិសដៅស្របគ្នា។

+ករណីគ្រោះថ្នាក់នេះ មិនបង្កឲ្យមានមនុស្សរងរបួសទេ តែបណ្ដាលឲ្យខូចខាតរថយន្តទាំងសងខាងកម្រិតធ្ងន់ ត្រូវបានសមត្ថកិច្ច យកមករក្សាទុកនៅការិយាល័យចរាចរណ៍ផ្លូវគោក។
+ដោយសារអ្នកបើកបរបង្កហេតុ ជាជនជាតិចិនដូចមានឈ្មោះខាងលើ មិនព្រមសារភាព និងបានប្រាប់សមត្ថកិច្ចថា ខ្លួនគេមិនមែនជាអ្នកបើកបរទេ អ្នកបើកបរគឺ ជានារីខ្មែរម្នាក់ដែលរូបគេស្គាល់នៅហាងផឹកស៊ី (មិនស្គាល់ឈ្មោះ) ជាអ្នកជូនរូបគេ ទៅរកកន្លែងដេក ។
+ក្រោយពីបានធ្វើការស្រាវជ្រាវ និងមានសាក្សីបញ្ជាក់ កម្លាំងជំនាញបានសន្និដ្ឋានថា អ្នកបើកបររថយន្តម៉ាក LEXUS RX300 បង្កគ្រោះថ្នាក់ចរាចរណ៍
ជាជនជាតិចិនឈ្មោះ CHENG GIMAN ភេទប្រុស ពិតប្រាកដមែន ។

បច្ចុប្បន្នកម្លាំងជំនាញកំពុងរៀបចំសំណុំរឿង បញ្ចូនទៅកាន់សាលាដំបូងខេត្តព្រះសីហនុ ដើម្បីចាត់ការតាមផ្លូវច្បាប់៕

មតិយោបល់