Post News Media ព័ត៌មានជាតិ សម្តេចតេជោ អន...

សម្តេចតេជោ អនុញ្ញាតឲ្យអនុរដ្ឋមន្ត្រីការពារជាតិសាធារណ:រដ្ឋកូរ៉េ ចូលជួបសម្តែងការគួរសម និងពិភាក្សាការងារ

ភ្នំពេញ: នារសៀលថ្ងៃទី២៨ ខែមិថុនា ឆ្នាំ២០១៦នេះសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា អនុញាតិឲ្យលោក វ៉ាង អ៊ីនម៉ូ (Hwang Inmoo) អនុរដ្ឋមន្ត្រីការពារជាតិ នៃសាធារណ:រដ្ឋកូរ៉េ ចូលជួបសម្តែងការគួរសម និងពិភាក្សាការងារ នៅវិមានសន្តិភាព។

លោក អ៊ាង សុផល្លែត ជំនួយការផ្ទាល់សម្តេចតេជោ បានប្រាប់ឲ្យដឹងនៅក្រោយជំនួបថា ក្នុងជំនួបនោះ លោក Hwang Inmoo បានគោរពជម្រាបជូនសម្តេចតេជោថា ដំណើរទស្សន:កិច្ចរបស់លោក នៅពេលដែលមកដល់រាជធានីភ្នំពេញនេះ លោកបានឃើញនូវស្ថានភាពរបស់រាជធានីភ្នំពេញ ចលនាប្រជាជន សកម្មភាពសេដ្ឋកិច្ច និងសកម្មភាពនៅក្នុងប្រទេសនេះ លោកមានជំនឿជឿជាក់ថា ព្រះរាជាណាចក្រកម្ពុជាយើង មានការអភិវឌ្ឍឈានទៅមុខ យ៉ាងឆាប់រហ័សជាទីបំផុត។

លោកក៏បានជម្រាបជូនទៀតថា ដំណើរទស្សន:កិច្ចរបស់លោកមកកាន់ព្រះរាជាណាចក្រកម្ពុជានាពេលនេះ ក៏នឹងដើម្បីជំរុញកិច្ចសហប្រតិបត្តិការ រវាងក្រសួងការពារជាតិទាំងពីរ ឲ្យបានឈានទៅដល់កម្រិតថ្មីមួយទៀត ក្នុងន័យនេះ លោកបានជម្រាបជូនសម្តេចអំពីជំនួបជាមួយនិងលោក ទៀ បាញ់ ឧបនាយករដ្ឋ រដ្ឋមន្ត្រីក្រសួងការពារជាតិ កាលពីព្រឹកមិញនេះ ហើយភាគីទាំងពីរ ក៏បានយល់ស្របគ្នា ជំរុញកិច្ចសហប្រតិបត្តិការ រវាងស្ថាប័នទាំងពីរក្នុងន័យជាបងប្អូន។

ជាការឆ្លើយតបសម្តេចអគ្គមហាសេនាបតី បានស្វាគមន៍នូវលទ្ធផល នៃជំនួបរវាងក្រសួងការពារជាតិ នៃប្រទេសទាំងពីរ ហើយបានមានប្រសាសន៍ថា សម្តេចបានមោទនភាពណាស់ ជាមួយនឹងទំនាក់ទំនង រវាងប្រទេសទាំងពីរ ទោះជាចំណងទាក់ទងនេះ មានរយ:ពេលខ្លីមែន ប៉ុន្តែបានបើកជំរុញឲ្យមានកិច្ចសហប្រតិបត្តិការ រវាងប្រទេសទាំងពីរ យ៉ាងស៊ីជម្រៅ។

លើសពីនេះទៅទៀតសម្តេចតេជោ បានធ្វើការណែនាំ ផ្តល់អនុសាសន៍បន្ថែមទៅលើកិច្ចសហប្រតិបត្តិការស៊ីជម្រៅ លើវិស័យការពារជាតិ វិស័យប្រយុទ្ធប្រឆាំងភេរវកម្ម ក៏ដូចជាចារកម្មដែរនោះ គប្បីណាពិនិត្យមើល ស្វែងរកនូវកិច្ចសហប្រតិបត្តិការ លើវិស័យផ្សេងទៀត ដូចជាវិស័យវិនិយោគ ទេសចរណ៍ និងការនាំផលិតផលកម្ពុជា ចេញទៅកាន់ទីផ្សារសាធារណ:រដ្ឋកូរ៉េផងដែរ៕

Loading...