ព័ត៌មានជាតិ

មួយភ្លែត២ករណីទៀតហើយ ដោយសារបុកទ្រូងផ្លូវ បុរសម្នាក់ស្លាប់ និង២នាក់ប្តីប្រពន្ធរងរបួស

ភ្នំពេញ: បុរស​ម្នាក់បានស្លាប់ភ្លាមៗនៅនឹងកន្លែង ​និង​ប្ដីប្រពន្ធ​២នាក់ទៀត​រងរបួស​ ខណ:ពេលបើកម៉ូតូមួយគ្រឿង និងរថយន្តមួយគ្រឿងទៀត ទៅបុករបាំងថ្មក្បាលព្រួញពុះចែកទ្រូងផ្លូវពេញទំហឹង​ ចំកន្លែងតែ​មួយ​នោះបន្ត​បន្ទាប់​គ្នា​ ដែលហេតុ​ការណ៍គ្រោះថ្នាក់ចរាចរណ៍​នេះកើតមានឡើង​​ត្រង់ចំណុចផ្លូវបំបែកជាបួន​ ស្តុបសួនច្បារក្ដាន់២​ ស្ថិតតាមបណ្ដោយផ្លូវសហព័ន្ធរុស្សីកែងផ្លូវR6 ស្ថិតក្នុងសង្កាត់ស្រះចក ខណ្ឌដូនពេញ​ រាជធានីភ្នំពេញ​ ។

ហេតុ​ការណ៍​ទី​១កើត​ឡើង​ ខណ:ដែលមេឃកំពុងធ្លាក់ភ្លៀងជោកជាំ មាន​បុរស​វ័យប្រហែល២៨ឆ្នាំ​ម្នាក់​ បើក​បរ​ម៉ូតូ​មួយ​គ្រឿង​ម៉ាក​ Honda Dream C125 ពណ៌ខ្មៅ​ ពាក់ស្លាកលេខ ភ្នំពេញ​ 1GS-1821 ធ្វើដំណើរតាមបណ្ដោយ​ផ្លូវ​សហព័ន្ធរុស្ស៊ី​ ទិសដៅ​ពី​កើត​ទៅ​លិច​ ក្នុងល្បឿនយ៉ាងលឿន​ លុះមកដល់​ចំណុច​កើត​ហេតុ​ស្រាប់​តែ​​រេចង្កូត​ទៅ​ខាង​ឆ្វេង​ ជ្រុល​ទៅ​បុក​និងក្បាលព្រួញ​ពុះ​ចែក​ទ្រូង​ផ្លូវ​ពេញ​ទំហឹង​ បណ្តាលឲ្យ​ម៉ូតូខ្ទេចស្ទើរទាំងស្រុង។ ចំណែកឯ​អ្នក​បើកបរ​រង​របួស​ធ្ងន់ធ្ងរ​ខ្លាំង ​ត្រូវ​បាន​រថយន្តគិលាន​សង្គ្រោះគ្លីនិកឯកជន ​ដឹក​យក​ទៅ​សង្គ្រោះ​ តែអកុសល​ជនរងគ្រោះបានស្លាប់តាមផ្លូវ។ ដោយឡែក​ក្បាល​ព្រួញ​ពុះ​ចែក​ទ្រូង​ផ្លូវ​រង​ការ​ខូចខាត​បែក​ឆ្កូត​បន្តិច​បន្តួច​។ ក្រោយមកសមត្ថកិច្ច​ជំនាញ​ក៏បាន​​ចុះ​មក​ធ្វើ​ការវាស់វែង​ និងស្រាវជ្រាវ​រកសាច់ញាតិ ដើម្បីឲ្យមកទទួលសពយកទៅធ្វើបុណ្យតាមប្រពៃណី ដោយតម្កល់ទៅវត្តទឹកថ្លា​ដើម្បី​រង់ចាំ​សាច់ញាតិ​ ។

ចំណែកឯ​ហេតុ​ការណ៍​ទី​២ កើតឡើង​នៅថ្ងៃទី​៣ ខែតុលា​ ឆ្នាំ​២០១៨​ ខណ:ពេលមេឃកំពុងរលឹមភ្លៀងស្រិចៗ មាន២នាក់ប្ដីប្រពន្ធបើកបរ​រថយន្ត​ មួយគ្រឿងដឹក​សម្ភារ:​គ្រឿងសង្ហារឹម ធ្វើអំពីឈើ ពេញសាំយ៉ុង១២កៅអី ពណ៌ស​ ពាក់ស្លាកលេខ​ ធ្វើដំណើរតាមបណ្ដោយ​ផ្លូវ​សហព័ន្ធរុស្ស៊ី​ ទិសដៅ​ពី​កើត​ទៅ​លិច​ ក្នុងល្បឿនយ៉ាងលឿន​ លុះមកដល់​ចំណុច​កើតហេតុ​ខាងលើនោះ ​ស្រាប់​តែ​​រេចង្កូត​ទៅ ជ្រុល​ទៅ​បុក​និងក្បាលព្រួញ​ពុះ​ចែក​ទ្រូង​ផ្លូវ​ពេញ​ទំហឹង​ បណ្តាលឲ្យរថយន្តខូចខ្ទេចផ្នែកខាងមុខយ៉ាងដំណំ រីឯរបាំងថ្មបាក់អស់១កង់ផងដែរ។ ចំណែកឯ​បុរសជាប្ដីរបួសធ្ងន់ចំដើមទ្រូង​រីឯស្ត្រីជាប្រពន្ធបានខ្ទាតបោកនិងកញ្ចក់រថយន្តរបួសបែកក្បាល ​ត្រូវ​បាន​រថយន្តគិលាន​សង្គ្រោះគ្លីនិកឯកជន ដឹកយកទៅសង្គ្រោះនិងព្យាបាលភ្លាមៗផងដែរ។

បច្ចុប្បន្ន​ក្រោយពេលកើតហេតុ​​​សមត្ថកិច្ចមូលដ្ឋានបានសហការជាមួយសមត្ថកិច្ច​ជំនាញ​ ចុះវាស់វែងនិងយក​រថយន្តបង្ក​ និងម៉ូតូ ទៅ​រក្សា​ទុក​នៅ​ការិយាល័យ​ចរាចរណ៍​ផ្លូវ​គោក ​នៃស្នង​ការដ្ឋាន​នគរបាល​រាជធានី​ភ្នំពេញ​ ដើម្បី​រង់ចាំចាត់ការ​បន្ត​ និងស្វែងរកសាច់ញាតិ​ បន្តទៀត។

គួរ​បញ្ជាក់​ថានៅពេលកន្លងមក​ ត្រង់​ចំណុច​កើត​ហេតុ​ខាងលើ​គឺរបាំងថ្ម​ក្បាល​ព្រួញ​ពុះ​ចែក​ទ្រូង​ផ្លូវ​នោះ តែងតែមានអ្នកដំណើរបើកទៅបុកជា​រឿយៗ​ ព្រោះមិនមាន​ស្លាក​ ឬ​ចំណាំង​ផ្លាត​អ្វី​នោះទេ​៕

មតិយោបល់