ភ្នំពេញៈ ជនសង្ស័យម្នាក់ ត្រូវសមត្ថកិច្ចឃាត់ខ្លួនបន្ទាប់ពីធ្វើសកម្មភាពលួចម៉ូតូមួយគ្រឿង ដែលគេចតទុកចោលនៅខាងមុខតូបលក់ទឹកត្នោតជូរ បានសម្រេចតែជាអរកុលសបែរជាលួចចំម៉ូតូខូចក៏ត្រូវម្ចាស់ម៉ូតូចាប់វាយទ្រោមខ្លួន បង្កឲ្យមានការណ៍ភ្ញាក់ផ្អើលឡើងកាលពីវេលាម៉ោង៤និង១០នាទីទៀបភ្លឺ ថ្ងៃទី២៦ ខែតុលា ឆ្នាំ២០១៨ ត្រង់ចំណុចខាងមុខផ្សារឈូកមាស តាមបណ្ដោយផ្លូវ២០១១ ស្ថិតក្នុងសង្កាត់គោកឃ្លាង ខណ្ឌសែនសុខ។
ជនសង្ស័យមានឈ្មោះ ចាន់ ស្មី អាយុ៣២ឆ្នាំ មុខរបរមិនពិតប្រាកដ ស្នាក់នៅម្តុំក្តាន់ពីរ ស្ថិតក្នុងសង្កាត់ស្រះចក ខណ្ឌដូនពេញ។ ចំណែកឯជនរងគ្រោះមានឈ្មោះ ស៊េង ម៉ុន អាយុ៥៥ឆ្នាំ ជាអ្នកលក់ទឹកត្នោតជូរ ស្នាក់នៅរោងលក់ទឹត្នោតជូរ ស្ថិតក្នុងភូមិច្រេះ សង្កាត់គោកឃ្លាង ខណ្ឌសែនសុខ។
តាមសម្តីពីជនរងគ្រោះ បានឲ្យយដឹងថា នៅមុនពេលកើតហេតុគាត់បានសម្រាកនៅក្នុងរោងលក់ទឹកត្នោតជូរ ដែលនៅខាងជើងវត្តសំរោងអណ្តែត ហើយចតម៉ូតូមួយគ្រឿងម៉ាក ZOOMER-X ពណ៌សលាយក្រហម ពាក់ស្លាកលេខ ភ្នំពេញ1GO-0650 នៅជិតគ្រែដែលគាត់សម្រាក ដោយមិនបានចាក់សោកម៉ូតូអ្វីនោះទេ ព្រោះគិតថាម៉ូតូខូច ដេមិនឆេះគ្មានចោរឯណាមកលួចបាននោះទេ។
លុះដល់វេលាម៉ោង២រំលងអធ្រាត្រថ្ងៃកើតហេតុ ខណៈដែលគាត់ងើបឡើង ក៏ស្រាប់តែមិនឃើញម៉ូតូរបស់គាត់ ហើយគាត់ក៏ឆោឡោនាំកូនក្មួយ ជិះដើររកម៉ូតូរបស់គាត់។ ខណៈគាត់ជិះមកដល់ចំណុចកើតហេតុ ក៏ប្រទះឃើញម៉ូតូរបស់គាត់ និងជនសង្ស័យ កំពុងបណ្តើរតែម្នាក់ឯង។
ភ្លាមៗនេះគាត់ក៏ស្រែកឆោឡោ បង្កឲ្យមានការណ៍ភ្ញាក់ផ្អើលដល់ប្រជាពលរដ្ឋដែលនៅក្បែរនោះ ជួយចាប់ឃាត់ហើយក៏បានស្វាគមន៍ម្នាក់មួយដៃមួយជើង បណ្តាលឲ្យទ្រោមខ្លួន រួចទើបប្រគល់ទៅឲ្យសមត្ថកិច្ចមូលដ្ឋាន នាំខ្លួនយកទៅសាកសួរនាំ។
ក្រោយពេលកើតហេតុជនសង្ស័យខាងលើ រួមទាំងវត្ថុតាងត្រូវបានសមត្ថកិច្ចប៉ុស្តិ៍នគរបាលរដ្ឋបាលគោកឃ្លាងធ្វើការសាកសួរនាំ និងកសាងសំណុំរឿង បញ្ជូនទៅអធិការដ្ឋាននគរបាលខណ្ឌសែនសុខ ដើម្បីរង់ចាំធ្វើការចាត់ការទៅតាមនីតិវិធីច្បាប់ជាបន្តទៀត៕
មតិយោបល់