ភ្នំពេញៈ នៅវេលាម៉ោង៩និង៤៥នាទីព្រឹក ថ្ងៃទី០៦ ខែវិច្ឆិកា ឆ្នាំ២០១៨ មានករណីគ្រោះថ្នាក់ចរាចរណ៍រវាងរថយន្តនិងម៉ូតូសណ្តោងរ៉ឺម៉ក ខ្ទាតទៅបុកជាមួយឡាំប៉ាតាមួយគ្រឿងទៀត បណ្តាលឲ្យរងការខូចខាតយ៉ាងដំណំ នៅតាមបណ្តោយផ្លូវ៣៧១ ភូមិឬស្សី សង្កាត់ស្ទឹងមានជ័យ២ ខណ្ឌមានជ័យ រាជធានីភ្នំពេញ។
រថយន្តបង្កម៉ាក ហ៊ីយ៉ាន់ដាយ ពណ៌ស ពាក់ស្លាកលេខ ភ្នំពេញ2B-5746 បើកបរពីកើតទៅលិចក្នុងល្បឿនលឿន លុះមកដល់កន្លែងកើតហេតុ បានវ៉ារថយន្តដឹកដី ហើយបានជ្រុលទៅបុកម៉ូតូសណ្តោងរ៉ឺម៉ក រួចខ្ទាតទៅបុកឡាំប៉ាតាឥណ្ឌានៅខាងមុខដែលធ្វើដំណើរបញ្រ្ចាសទិសគ្នា បណ្តាលឲ្យរងការខូចខាតរថយន្តនិងរ៉ឺម៉ក២គ្រឿងតែម្តង។
ក្រោយពេលកើតហេតុ សមត្ថកិច្ចបានចុះទៅដល់កន្លែងកើតហេតុ ដោយមានសមត្ថកិច្ចខណ្ឌដង្កោ និងសមត្ថកិច្ចខណ្ឌមានជ័យ ហើយបានរុញដាក់ទៅគ្នាម្ដងថាទឹកដីខណ្ឌដង្កោ ម្ដងថាទឹកដីខណ្ឌមានជ័យ។
ក្រោយមកសមត្ថកិច្ចបាននាំយករថយន្តនិងរ៉ឺម៉ក២គ្រឿង ទៅរក្សាទុកនៅអធិការខណ្ឌដង្កោ ដើម្បីដោះស្រាយគ្នានៅពេលក្រោយ៕
មតិយោបល់