មណ្ឌលគិរីៈ ក្នុងរយៈពេលតែមួយខែ នៅដើមរដូវវស្សាឆ្នាំនេះ គ្រប់ស្រុកនៅក្នុងខេត្តមណ្ឌលគិរីបានទទួលសម្ពាធយ៉ាងធ្ងន់ពីមេរោគ គ្រុនឈាម ដ៏កាចសាហាវមួយនេះ។
លោក សៀ សុខមៀន ប្រធានមន្ទីរពេទ្យបង្អែកខេត្ត បានឲ្យដឹងនៅព្រឹកថ្ងៃទី១ ខែកក្កដា ឆ្នាំ២០១៦ ថា ជំងឺគ្រុនឈាមពិតជាបាន និងកំពុងកើតមានមកលើមនុស្សក្មេងចាស់ប្រុសស្រីស្ទើរគ្រប់ស្រុកទូទាំងខេត្តពិតប្រាកដមែន ជំងឺគ្រុនឈាមឆ្នាំនេះ វាហាក់មានការផ្ទុះឡើងយ៉ាងច្រើនករណីមែនទែន ខុសគ្នាពីបណ្តាឆ្នាំមុនៗ តែទោះបីជំងឺនេះ កំពុងផ្ទុះឡើង ច្រើនករណីយ៉ាងណាក៏ដោយ ប៉ុន្តែគ្រោះថ្នាក់ដល់អាយុជីវិតមនុស្ស ពុំទាន់មានច្រើនករណីនៅឡើយទេ ពោលមានតែក្មេងប្រុសម្នាក់ បានស្លាប់ប៉ុណ្ណោះ នៅស្រុកពេជ្រាដា តែពេលនេះ អត្រាថមថយចុះហើយ។
លោកបន្ដថា បញ្ហាដែលមានផ្ទុះឡើងនូវជំងឺនេះ ច្រើនអាចកើតឡើងដោយសារបម្រែបម្រួលអាកាសធាតុ និងមកពីការចំលងមកពីមូសខ្លាខាំ។ លោកក៏បានសំណូមពរដល់បងប្អូនប្រជាពលរដ្ឋ មេត្តាបង្កើនការយល់ដឹងឲ្យបានខ្ពស់បំផុត អំពីវិធីការពារកុំឲ្យកើតមានជំងឺទាំងនេះ ដូចជា ត្រូវធ្វើអនាម័យខ្លួន កាប់ឆ្ការព្រៃជុំវិញផ្ទះសម្បែង លុបថ្លុក របស់ដែលដក់ទឹកដែលជាជម្រកសត្វមូសបង្កពង។
លោក ប៊ុន សួរ ប្រធានមន្ទីសុខាភិបាលបានមានប្រសាសន៍ប្រាប់ភ្ងាក់ងារយើងដែរថា ករណីនេះ បានធ្វើឲ្យលោកមានការព្រួយបារម្ភយ៉ាងខ្លាំព្រោះអី មេរោគមួយនេះ បានធ្វើឲ្យប្រជាជនស្ទើរគ្រប់ស្រុក ព្រួយបារម្ភពីសុវត្តិភាពខ្លួនខ្លាចកើតចំលើគ្រួសារខ្លួន។
លោកបានបន្តដែរ ថា សព្វថ្ងៃខាងមន្ត្រីរបស់លោកក៏មិនព្រងើយកន្តើយដែរ គឺលោកបានដាក់បញ្ជាឲ្យចុះដល់មូលដ្ឋាននានាក្នុងតំបន់រងគ្រោះ ដើម្បីបាញ់ថ្នាំកាពារ និងពន្យល់ដល់ប្រជាពលរដ្ឋឲ្យចេះ ប្រយ័ត្ន ប្រសិនមានអាការៈ មិនស្រួលប្រញាប់មកពិនិត្យឲ្យទាន់ពេលផងដែរ៕
មតិយោបល់