Post News Media ព័ត៌មានជាតិ ចិនទៀតហើយ! រថ...

ចិនទៀតហើយ! រថយន្ត​ជនជាតិចិន បុកគូទរថយន្តជនជាតិខ្មែរ កំពុងឈប់ស្តុប បញ្ចប់ត្រឹមសំណង៥០០ដុល្លារ

ភ្នំពេញ: បុរសជាជនជាតិចិន​ម្នាក់ ​បើក​រថយន្ត​ឡុចស៊ីស​មួយគ្រឿងបោះពួយយ៉ាងលឿនមិនប្រយ័ត្ន ក៏ជ្រុលទៅបុកគូទរថយន្តមួយគ្រឿងទៀតដែល​កំពុងឈប់រងចាំស្តុបបណ្តាល​ឲ្យ​រង​ការ​ខូចខាត​ទាំង​សងខាង​ កាលពីវេលាម៉ោង​១១​យប់​ ថ្ងៃទី​១០​ ខែធ្នូ​ ឆ្នាំ​២០១៨​ ត្រង់ចំណុច​ស្តុប​ផ្សារ​ដេប៉ូ​ តាមបណ្តោយផ្លូវ​២១៥​ ស្ថិត​ក្នុង​សង្កាត់​ផ្សារ​ដេប៉ូ​ទី​២​ ខណ្ឌ​ទួលគោក​។

តាមប្រភពព័ត៌មាន​ពី​កន្លែង​កើត​ហេតុ​បានឲ្យដឹងថា​ នៅមុន​ពេល​កើត​ហេតុ​គេ​ឃើញ​បុរស​ម្នាក់​និង​នារីម្នាក់បានបើកបររថយន្ត​មួយ​គ្រឿង​ម៉ាក​ ហ្វតរ៉េនជ័រ​ ពណ៌​ស​ ពាក់ស្លាកលេខ​ ភ្នំពេញ​ 2AM-7482 ដោយ​ធ្វើ​ដំណើរ​តាមបណ្តោយផ្លូវ​២១៥​ ក្នុង​ទិសដៅ​ជើងទៅត្បូង​។ លុះដល់វេលាកើតហេតុ​រថយន្ត​ខាងលើក៏បាន​ឈប់​ស្តុប​រង់ចាំលោតភ្លើង​បៃតង​ដើម្បី​បន្ត​ដំណើរ​ទៅ​មុខ​ទៀត​ ខណ:​ពេល​នោះ​ក៏​ស្រាប់​តែ​មាន​រថយន្ត​មួយ​គ្រឿង​ទៀត​ម៉ាក​ ឡុចស៊ីស​RX400 ពណ៌​ស្ករ​ ពាក់​ស្លាក​លេខ​ ភ្នំពេញ​ 2AO-5988 ដែល​បើកបរ​ដោយ​បុរស​ជាជនជាតិ​ចិន​ម្នាក់​ មក​ពី​ក្រោយ​ក្នុង​ល្បឿន​យ៉ាង​លឿន​។ រួចក៏ទៅបុក​គូទ​រថយន្ត​ខាង​បណ្តាល​រថយន្ត​ហ្វតរង​ការ​ខូចខាត​ក្រពឹតកាង​ផ្នែកខាងក្រោយ។​ ចំណែក​ឯ​រថយន្ត​បង្ក​រងការខូចខាត​ក្រពឹតផ្នែកខាងមុខ​យ៉ាង​ដំណំ​។

ក្រោយ​ពេញ​កើតហេតុក៏មាន​ដំណាង​ភាគី​រថយន្ត​បង្ក​បាន​ចេញ​មុខ​មក​ដោះ​ស្រាយ​ ដោយចរចា​រសម្របសម្រួល​គ្នា​និងចេញ​សំណង​ចំនួន​៥០០ដុល្លារ​ឲ្យខាងរថយន្ត​ហ្វតដើម្បី​បញ្ចប់​រឿង​នៅ​នឹង​កន្លែង​កើត​ហេតុ​៕