ភ្នំពេញៈ ក្មេងទំនើងពីរក្រុម បានបើកឆាកប្រយុទ្ធគ្នាតាមដងផ្លូវ ប្រដាប់ដោយដំបង ដុំថ្ម និងខ្សែក្រវាត់ បណ្តាលរងរបួសបែកក្បាលចំនួន៣នាក់ រួចក៏ត្រូវសមត្ថកិច្ច ចុះទៅអន្តរាគមន៍ចាប់ឃាត់ខ្លួនបានចំនួន៧នាក់ និងដកហូតម៉ូតូប្រាំគ្រឿង កាលពីវេលាម៉ោង១២ និង១០នាទីរំលងអធ្រាត្រឈានចូលថ្ងៃទី១២ ខែធ្នូ ឆ្នាំ២០១៨ ត្រង់ចំណុចទល់មុខស្ថានីយប្រេងឥន្ធនៈ តូតាល់ តាមបណ្តោយផ្លូវ២០០៤ ស្ថិតក្នុងសង្កាត់អូបែកក្អម ខណ្ឌសែនសុខ។
តាមប្រភពព័ត៌មានពីសមត្ថកិច្ចមូលដ្ឋាន បានរៀបរាប់ឲ្យដឹងថា នៅមុនពេលកើតហេតុ គឺមានប្រជាពលរដ្ឋបានរាយការណ៍មកប្រាប់ថា មានក្មេងទំនើងពីរក្រុម ដោយមួយក្រុមមានគ្នាជិត១០នាក់ ដែលដៃប្រដាប់ដោយដំបង ដុំថ្មនិងខ្សែក្រវាត់ បានកំពុងតែដេញវាយតប់គ្នា នៅត្រង់ចំណុចកើតហេតុខាងលើ។ ភ្លាមៗនោះ កម្លាំងសមត្ថកិច្ចក៏ចុះទៅធ្វើការអន្តរាគមន៍ ចាប់ឃាត់ខ្លួនបានក្មេងទំនើងខាងលើចំនួន៧នាក់ ដែល៣នាក់បានរងរបួសបែកក្បាលឈាមហូរស្រោចខ្លួន និងដកហូតបានម៉ូតូប្រភេទម៉ូតូធំ ចំនួន៥គ្រឿង ដោយឡែកបក្ខពួកប៉ុន្មាននាក់ទៀត បានជិះម៉ូតូរត់គេចខ្លួនបាត់សម្រោល ខណៈដែលឃើញកម្លាំងសមត្ថកិច្ចចុះទៅដល់។
ក្រោយពេលកើតក្រុមក្មេងទំនើងទាំង៧នាក់ខាងលើ រួមទាំងវត្ថុតាង ត្រូវបានកម្លាំងសមត្ថកិច្ចនាំខ្លួនយកទៅសាកសួរនាំនិងឃុំខ្លួនបណ្ដោះអាសន្ននៅអធិការដ្ឋាននគរបាលខណ្ឌសែនសុខ ដើម្បីរង់ចាំធ្វើការចាត់ការជាបន្ត៕
មតិយោបល់