កំពង់ឆ្នាំងៈ នៅព្រឹកថ្ងៃទី០៥ ខែកក្កដា ឆ្នាំ២០១៦ មន្ត្រីមន្ទីរសាធារណការ និងដឹកជញ្ជូនខេត្ត បានសហការជាមួយមន្ត្រីនគរបាលក្រុង នគរបាលប៉ុស្តិ៍ និងចៅសង្កាត់កំពង់ឆ្នាំង កោះអញ្ជើញអ្នកបើកបរគោយន្តចំនួន២៥នាក់ នៅក្នុងសង្កាត់កំពង់ឆ្នាំង មកធ្វើការណែនាំអប់រំណែនាំ អំពីច្បាប់ចរាចរណ៍ និងបានបំពាក់ចំណាំងផ្លាតពីក្រោយរ៉ឺម៉កគោយន្ត និងបិតខិតប័ណ្ណ ច្បាប់ចរាចរណ៍ នៅលើគោយន្តនៅក្នុងប៉ុស្តិ៍នគរបាលរដ្ឋបាលកំពង់ឆ្នាំង ក្នុងគោលបំណងបញ្ចៀស និងទប់ស្កាត់គ្រោះថ្នាក់ចរាចរណ៍ដោយសារគោយន្តគ្មានភ្លើង ឬគ្មានចំណាំងផ្លាតពីក្រោយ។
លោក មាស ឈុនលី អនុប្រធានការិយាល័យដឹកជញ្ជូន នៃមន្ទីរសាធារណការខេត្ត បានឲ្យដឹងថា តាមផ្លូវច្បាប់រថយន្ត កែច្នៃ ដូចជា គោយន្តនេះ គ្មានផ្លាកលេខ គ្មានភ្លើងបំភ្លឺមុខក្រោយ មិនអាចបើកបរនៅលើផ្លូវជាតិបានឡើយ ប៉ុន្តែដោយសារការអនុគ្រោះរបស់អាជ្ញាធរ និងសមត្ថកិច្ចនៅក្នុងខេត្ត ក៏ចេះតែអធ្យាស្រ័យចំពោះប្រជាកសិករយើងទៅ។ ដោយឡែក ដើម្បីទប់ស្កាត់ហានិភ័យ ចំពោះការប្រើប្រាស់គោយន្ត ម្ចាស់គោយន្តទាំងអស់ត្រូវ តែចេះដឹងអំពីច្បាប់ចរាចរណ៍ ផ្លាកសញ្ញាចរាចរណ៍ ករណីសំខាន់ដែលមិនអាចខ្វះបាននោះ គឺគោយន្តទាំងអស់ ត្រូវតែ មានភ្លឺបំភ្លឺពីមុខ ពីក្រោយ និងពិសេស គឺត្រូវតែមានចំណាំងផ្លាតពីក្រោយ ដើម្បីកុំឲ្យយានយន្តផ្សេងៗទៀតបើកបុកគោយន្តពីក្រោយ។
លោក ម៉ុយ អ៊ីម នាយផ្នែកនគរបាលចរាចរណ៍ នៃអធិការដ្ឋាននគរបាលក្រុងកំពង់ឆ្នាំងបានលើឡើងថា បើគ្មានការចាំបាច់ទេ គោយន្តទាំងអស់មិនត្រូវបើកបរនៅលើផ្លូវជាតិឡើយ ពិសេសនៅពេលយប់ ប៉ុន្តែបើមានការចាំបាច់នោះ ម្ចាស់គោយន្តត្រូវតែបិតចំណាំងផ្លាតនៅខាងក្រោយ និងខាងមុខគោយន្តក៏ត្រូវតែមានភ្លើងបំភ្លឺផ្លូវផងដែរ។ ម្យ៉ាងទៀត ការផ្ទុកឥវ៉ាន់ ឬសម្ភារនៅលើគោយន្ត ក៏មិនត្រូវសំពីងសំពោង បាំងចំណាំងផ្លាតពីក្រោយដែរ ដែលអាចនាំបង្កឲ្យមានគ្រោះថ្នាក់ចរាចរណ៍ ប្រសិនបើមានយានយន្តមកបុកគោយន្តយើងពីក្រោយ នោះម្ចាស់គោយន្តត្រូវតែទទួលខុសត្រូវ ព្រោះថាគោយយន្ត ក្នុងច្បាប់មិនអនុញ្ញាតឲ្យបើកបរនៅលើផ្លូវជាតិឡើយ។
លោកក៏បានបញ្ជាក់ទៀតថា កាលពីចុងសប្តាហ៍មុន ក្រុមការងានេះក៏បានចុះទៅបិតចំណាំងផ្លាតឲ្យគោយន្តនៅក្នុងសង្កាត់ខ្សាម បានចំនួន៣០គ្រឿងផងដែរ និងក្នុងពេលខាងមុខនេះ និងចុះធ្វើដូចនេះនៅក្នុងសង្កាត់២ទៀត។
ដោយឡែក លោកស្រី ហែម សុផេង ចៅសង្កាត់រងសង្កាត់កំពង់ឆ្នាំង បានសំណូមពរដល់ប្រជាពលរដ្ឋជាម្ចាស់គោយន្តទាំងអស់នៅក្នុងសង្កាត់កំពង់ឆ្នាំង សូមស្វែងយល់អំពីច្បាប់ចរាចរណ៍ ផ្លាកសញ្ញាចរាចរណ៍ ឲ្យបានច្បាស់លាស់ទាំងអស់គ្នា និងត្រូវតែចូលរួមបិតផ្លាកចំណាំងផ្លាតពីក្រោយគោយន្តឲ្យបានទាំអស់គ្នា ដើម្បីកុំឲ្យកើតមានគ្រោះថ្នាក់ចរាចរណ៍ដល់ខ្លួន ហើយបើបង្កឲ្យគេស្លាប់ និងមានទោសជាប់ពន្ធនាគារទៀតផង៕
មតិយោបល់