ភ្នំពេញ: ករណីគ្រោះថ្នាក់ចរាចរណ៍មួយ ដោយរថយន្តម៉ាកលុចស៊ីស៤៧០ បានបើកបុកផ្ទប់រថយន្តស៊េរីទំនើបចំនួន២គ្រឿង ដែលកំពុងឈប់រង់ចាំភ្លើងស្តុប បណ្តាលឲ្យរងការខូចខាត កាលពីវេលាម៉ោង៥ និង៤៥នាទីល្ងាចថ្ងៃទី២៤ ខែធ្នូ ឆ្នាំ២០១៨ ត្រង់ចំណុចផ្លូវ៣១០ កែងនិងផ្លូវព្រះមុនីវង្ស សង្កាត់បឹងកេងកង១ ខណ្ឌចម្ការមន រាជធានីភ្នំពេញ។
សមត្ថកិច្ច បានឲ្យដឹងថា មុនពេលកើតហេតុគេឃើញមានបុរសជនជាតិជប៉ុនម្នាក់ បានបើករថយន្តមួយគ្រឿង ម៉ាកឡង់គ្រីស្ស័រ ពណ៌ទឹកប្រាក់ ស៊េរីឆ្នាំ២០១០ ពាក់ស្លាកលេខ ភ្នំពេញ ២W-១១១៦ និងមួយគ្រឿងទៀតម៉ាកឡង់គ្រីស្ស័រ ពណ៌ខ្មៅ ស៊េរីឆ្នាំ២០១១ ពាក់ស្លាកលេខ ភ្នំពេញ ២R-៣១៣៤ បើកបរដោយបុរសជនជាតិជប៉ុនម្នាក់។
ប្រភពដដែល បានបន្ថែមថា រថយន្តម៉ាកឡង់គ្រីស្ស័រទាំង២គ្រឿង បានធ្វើដំណើរពីត្បូងទៅជើង ដោយរថយន្តពណ៌ទឹកប្រាក់ បើកនៅខាងមុខ លុះមកដល់ចំណុចកើតហេតុ បានឈប់រង់ចាំភ្លើងស្តុប ក៏ស្រាប់តែបុរសម្នាក់ ជាជនជាតិខ្មែរ មានវ័យជាង៣០ឆ្នាំ បានបើករថយន្តមួយគ្រឿងម៉ាកលុចស៊ីស ៤៧០ ពណ៌ខ្មៅ ពាក់ស្លាកលេខ ភ្នំពេញ ២E-៨៩៩៩ ក្នុងទិសដៅស្របគ្នា មកពីក្រោយក្នុងល្បឿនលឿន ព្រមទាំងស្រវឹងផងនោះ ក៏ជ្រុលទៅបុករុញផ្ទប់រថយន្តឡង់គ្រីស្ស័រ ស៊េរីទំនើបទាំង២គ្រឿង ដែលកំពុងឈប់រង់ចាំភ្លើងស្តុប បណ្តាលឲ្យរថយន្តទាំងសងខាងរងខូចខាត សំណាងល្អពុំបង្កឲ្យមានគ្រោះថ្នាក់នោះទេ ។
ក្រោយពេលកើតហេតុ ដោយសាររថយន្តគ្រឿងខូចខាតតិចតួច ក៏ជិះចេញទៅបាត់ នៅសល់រថយន្តពីរគ្រឿងប៉ុណ្ណោះ ដែលធ្វើការសម្របសម្រួលគ្នាមិនត្រូវ ទើបសមត្ថកិច្ចជំនាញធ្វើការវាស់វែង យកទៅរក្សាទុកនៅការរិយាល័យចរាចរណ៍ជើងគោករាជធានីភ្នំពេញ ដើម្បីរង់ចាំធ្វើការដោះស្រាយនៅពេលក្រោយ៕
មតិយោបល់